Sei sakandar gutxiago

Sakanak 2014 eta 2017 urteen artean 624 biztanle galdu zituen. Populazioaren beherako joera 2018an moztu zen, hazkunde txiki batekin. Baina 2019ko aurreneko egunean egindako zenbaketak biztanlerian jaitsiera txikia ekarri du: 6 sakandar gutxiago, guztira 20.189. Haietatik 10.380 (% 51,41) gizonezkoak dira, 2018an baino 14 gehiago (% 0,14ko hazkundea). Emakumezkoak, berriz, 9.809 dira (% 48,59), 2018an baino 20 gutxiago (% 0,20). Beraz, emakumezkoak baino 571 gizonezko gehiago daude Sakanan (34 eta % 6,33 gehiago). Ibarreko udalerri guztietan daude gizonezko gehiago emakumezkoak baino. 

Udalerrika 
15 dira Sakanan dauden udalerriak eta haietako seitan soilik igo da biztanleria. Portzentaiari erreparatuta, herritar gehien irabazi duen udalerria Iturmendi da (% 5,5; 21 biztanle gehiago). Atzetik ditu Bakaiku (% 4,93; 17), Arruazu (% 3,77; 4), Irurtzun (% 1,09; 24), Lakuntza (% 0,55; 7) eta Altsasu (% 0,49; 36). Soilik hiru herrik eusten diote aurreko urteko biztanleriaren gorako joerari: Arruazuk, Irurtzunek eta Lakuntzak. Urte bat pasata ere populazio bera duen herri bakarra Uharte Arakil da. 

Populazioa galtzen dutenen segida, ehunekoari erreparatuta, honakoa da: Ziordia (-% 3,6; -13), Urdiain (- % 3,26; -22), Ergoiena (- % 3,13; -12), Irañeta (- % 2,27; -4), Arbizu (- % 1,78; -20), Arakil (- % 1,69; -16), Etxarri Aranatz (- % 0,8; - 20) eta Olatzagutia (- % 0,53; - 8). Populazioa galdu duten udalerrien artean bik errepikatzen dute. Ergoienak eta Olatzagutiak. Burundako herria 2018an 1.500 biztanleko mugatik jaitsi egin zen eta beherako joerarekin segitzen du. Bestalde, Etxarri Aranatzek estreinakoz 2.500 herritarreko muga pasa zuen 2018an, baina, atzera ere behera egin du. 

Hamar urte atzera
2019ko eta 2010eko datuak parekatzean agerian gelditzen da Sakanak 616 biztanle galdu dituela, % 2,96. Generoari erreparatuta, duela 10 urte baino 369 gizonezko gutxiago (% 3,43) bizi gara ibarrean. Emakumezkoei dagokienez, berriz, 247 gutxiago (% 2,46). Herritik herrira biztanleriaren jokaera aldatu egiten da azken 10 urteetan. Zazpi herritan igo da populazioa hamarkada batean. Portzentaiari erreparatuta hazkunde handiena Irañetak izan du: % 9,55 eta 15 irintar gehiago. Atzetik honako udalerriak ditu: Bakaiku (% 6,47; 22), Lakuntza ( % 4,95; 60), Arbizu (% 2,03; 22), Iturmendi (% 0,75; 3), Irurtzun (% 0,13, 3) eta Etxarri Aranatz (% 0,04, 1). 

Azken 10 urteetan populazioa galdu duten herriak zortzi dira. Ehunekoari erreparatuta biztanle galera handiena duen udalerria Ergoiena da, % 13,38 eta 60 herritar gutxiago. Atzetik doazkio: Olatzagutia (-% 13,38; -230), Ziordia (-% 11,22; - 44), Urdiain (-% 8,03; -57), Uharte Arakil (-% 7,04; -61), Arakil (-% 3,32; -32), Altsasu (-% 3,31; -255) eta Arruazu (-% 2,65; -3). 

Nafarroa 
Aurreko urteko goranzko joerari segituz, 2018tik 2019ra Nafarroak 6.660 herritar irabazi zituen, % 1,03. Haietatik emakumezkoak 330.583 ziren, % 50,53, aurreko urtean baino 3.498 gehiago, % 1,07ko hazkundea. Gizonezkoak, berriz, 323.631 ziren, % 49,47, 2018an baino 3.162 gehiago, % 0,99. Nafarroako populazioak gora egitean eta Sakanakoak behera, ibarra Nafarroako biztanlerian duen pisua txikitu egin da eta 2019an % 3,09 zen, % 0,02 gutxiago. 2017tik 2019ra % 0,07ko pisua galdu du Sakanak Nafarroan.