Elkartean, tabernan, okindegian, liburutegian… Halako tokietan elkartzen dira Mintzakide programako taldeak Sakanan. Baina izan daiteke ere, pasio bat emateko, zinemara joateko, mendira, bizikletan ibiltzeko… Kontua da talde txiki bat elkartzea eta haien artean euskaraz hitz egitea. Mintzakiden izena ematen duten gehienek euskara badakite, edo ikasten ari dira, baina ez dute praktikatzeko aukera handirik. Antzeko egoeran dauden beste pertsonekin talde txikietan elkartzean gehiago hitz egiteko aukera sortzen zaie. Gainera, aldamenean, euskaraz aritzeko joera duen euskaldun bat dute beti.
Sakanan bederatzi herritan Mintzakideko 14 talde daude martxan gaur egun. Astean behin ordu batez euskaraz hitz egitera elkartzen dira. Sakanako Mintzakideko Aitor Irigoienek esan digunez, aurten Uharte Arakilen eta Etxarri Aranatzen talde bana osatu nahiko lukete. Gainerako herrietan talde berriak sortzeko aukera ere badagoela esan digu. Irigoienek azaldu digunez, “ikasi dugun euskara praktikan jartzea oso garrantzitsua da mingaina askatzeko, berdin da euskara perfektu bat ez hitz egitea. Mintzakide programak mingaina euskaraz askatzea du helburu; modu horretan euskarari bultzada eta geure buruari konfiantza ematea lortuko dugu”. Gaineratu duenez, “mintzakide taldeak erabakitzen duela euskara nola praktikatu: tabernan mahai baten inguruan, elkartean errezeta bat prestatzen, paseoan... ez dago mugarik!”
Dohainik
Mintzakiden parte hartzeak ez du kosturik. Izena eman nahi duenak 600 482 024 telefono zenbakira hots egin dezake, sakana_mintza@aek.eus e-posta idatzi, Facebook-eko Sakanako Mintzakideak profilean sartu edo AEKren Itsasi euskaltegitik (Altsasuko Gartzia Ximenez 46. zenbakia) pasa daiteke.
| Sakanako Mintzakide taldeak | |||
| Herria | Eguna | Ordua | Tokia |
| Irurtzun | Astelehenetan | 18:00 | Iratxo elkartea |
| Asteazkenetan | 09:00 | Pikuxar euskal txokoa | |
| Ostiraletan | 18:00 | Pikuxar euskal txokoa | |
| Irañeta* | Astelehenetan | 19:00 | Txapel azpi elkartea |
| Lakuntza | Asteazkenetan | 18:45 | Gure Nahia elkartea |
| Arbizu | Astearteetan | 18:00 | Aralar taberna |
| Iturmendi | Astelehenetan | 17:00 | Aritzaga elkartea |
| Urdiain | Ostegunetan | 19:00 | Liburutegia |
| Altsasu | Astelehenetan | 16:00 | Koxka taberna |
| Asteazkenetan | 11:30 | Espejo taberna | |
| Ostegunetan** | 20:00 | Lezea taberna | |
| Ostiraletan | 09:00 | Alde zaharreko okindegia | |
| Olatzagutia | Ostegunetan | 17:00 | Agedi taberna |
| Ziordia | Astearteetan | 16:00 | Liburutegia |
| *Astelehen Zoriontsuak. Hilabetean behin biltzen dira. | |||
| **Altsasuko euskalkia lantzeko taldea bi astean behin elkartzen da. | |||