Pilota

Ezkurdia: "Aurtengo finalerdiak ez du aurreko urtekoarekin zerikusirik, Jakak asko hobetu duelako"

Maider Betelu Ganboa 2020ko abe. 18a, 14:00
Ezkurdiak eta Jakak atzo aukeratu zuten materiala eta antzeko pilotak hautatu zituzten. Argazkia: Aspe.

Joseba Ezkurdiak eta Erik Jakak Lau eta Erdiko finalerdia jokatuko dute igandean pilotaren katedralean, Astelenan. Buruz Buruko txapeldunaren eta egungo Lau eta Erdiko txapeldunaren arteko partidak final handien itxura du, lehia estua aurreikusten da, eta ez dago faborito argirik

Azken hilabetean Joseba Ezkurdiak ez du atsedenik hartzeko betarik ere izan. Izan ere, epe labur horretan hiru txapelketa ezberdinetan parte hartu behar izan du arbizuarrak, horrek dakarren neke fisiko eta psikologikoarekin. Atera kontuak. 

Azaroaren 15ean Buruz Buruko final laurdena jokatu zuen Altunaren kontra, eta 18 eta 22 galdu eta txapelketatik kanpo geratu eta gero, “lur jota” zegoela aitortu zuen aurrelari arbizuarrak. "Pena da, pare bat egun oso izorratuta pasako ditut baina buelta emango diot. Txapelketak bata bestearen atzetik ditugu, eta horren alde ona da egoerari aurre egitera behartuta gaudela” adierazi zuen orduan. 

Binakako txapela etxera
Buruz Burukoa kolpe ikaragarria izan zen arbizuarrarendako, baina Julen Martijaren laguntzarekin burua Binakako Txapelketan jarri zuen. Abenduaren 4an jokatutako finalerdian biko sakandarrak Agirreri eta Albisuri 22 eta 9 irabazi zien partida oso gogorrean, eta 4 egun beranduago, Bizkaian ateak itxita jokatutako final handian, Ezkurdiak eta Martijak merezitako txapela jantzi zuten Olaizola II.a eta Urrutikoetxea 13 eta 22 mendean hartu eta gero, 900 pilotakada gurutzatu ziren final estu, gogor eta lehiatuan. Martijarendako bere lehen finala izan zen eta Etxeberrikoak bere lehen txapela jantzi zuen, beteranoen pare bikain jokatu eta gero, eta Joseba Ezkurdiak Binakako bere bigarren txapela lortu zuen, 2018an Zabaletarekin lortutakoaren atzetik, partida ikusgarria egin eta gero. Pandemia dela eta, ez zuten txapela behar bezala ospatzerik izan. 

Eta gaitzerdi. Izan ere, atsedenik hartzeko tarterik gabe, Binakako finala jokatu eta 5 egun eskasera, Lau eta Erdiko Txapelketako final laurdena jokatu behar izan zuen igandean Joseba Ezkurdiak Iñaki Artolaren kontra. Artola 8 tantotan utzita, finalerdietarako txartela lortu zuen arbizuarrak. “Beldurrez etorri naiz, hankaz-eta ez nintzen oso azkar ikusten. Hasieran erritmo handiarekin hasi gara biak, eta partida gogorra izaten ari zen, baina seinako berdinketatik aurrera Iñaki sufritzen ikusi dut. Uste dut egin beharrekoak ongi egin ditudala, buruz ongi ikusi naiz, gogor, sufritzeko prest, eta pozik nago irabazi eta Lau eta Erdiko finalerdietan nagoelako” azaldu zuen Ezkurdiak. 

Ezkurdia: "Azken asteak oso gogorrak izaten ari dira fisikoki eta psikologikoki"

Oso estua, faborito argirik gabe
Kaiolako hirugarren txapela lortu nahi du arbizuarrak (2018an eta 2019an irabazi zituen beste biak), baina horretarako igandeko finalerdian Erik Jaka, egungo Buruz Buruko txapelduna, izanen du aurrez aurre. Ezkurdia egungo lau eta erdiko txapelduna da, eta beraz, bi txapeldun handi ariko dira elkarren kontra, final itxura duen eta faborito argirik ez duen finalerdian. Aipagarria da 2020ko Lau eta Erdiko finalerdiak 2019ko finalerdien ia kalkoa direla. Joan den urtean Ezkurdiak eta Jakak jokatu zuten finalerdietako bat, eta Altunak eta Lasok bestea. Aurten Ezkurdiak eta Jakak errepikatuko dute, baina Bengoetxea VI.ak hartuko du Lasoren tokia Altunaren kontra aritzeko, larunbatean, Bizkaia pilotalekuan (17:45, ETB1). Ezkurdiaren eta Jakaren arteko finalerdia, aldiz, pilotaren katedralak hartuko du, Astelenak, igandean (17:00, ETB1).  

Ezkurdiak dio Eriken kontra “ongi defendatu beharra” dagoela
Joseba Ezkurdiak eta Erik Jakak, biek ala biek, lau eta erdira egokitzeko apenas izan dute tarterik, bata bestearen atzetik jokatu baitira Buruz Burukoa, Binakakoa eta Lau eta Erdia. Kaiolako distantziara egokitzeko entrenamendu askorik ezin izan dute egin, baina finalean egoteko gogotsu daude biak. 

Joan den urteko finalerdian 20 eta 22 irabazi zion Ezkurdiak Jakari, eta horretarako ederki sufritu behar izan zuen arbizuarrak. 15 eta 6 aurreratu zen Ezkurdia, baina Jakak buelta eman zion.  21 eta 20 gerturatu zen Jaka, baina Ezkurdia gai izan zen une erabakigarri horietan eusteko, eta txokoan bolea bikain bat jo eta gero, 22 eta 20 irabazi zuen. Bi pilotariak ikusleak txalotzen eta ikusle guztiek bi pilotariei esker onak azaltzen despeditu zen finalerdia, final handien itxura izan zuena. Eta halako finalerdi estua espero da igandean Eibarren. 

Ezkurdia: "Buruz Buruko txapeldunarekin aritzeko ilusioa dut. Partida zaila dut; Erikek asko jokatzen du eta asko exijitzen du, arerio latza da"

“Partida zaila dut. Final laurdenean hasieran hankaz-eta ez nintzen azkar ikusten, eta iganderako hori hobetu beharra dut, Erikek asko exijitzen baitu defentsan, asko arriskatzen du, eta bere kontra ongi defendatu beharra dago. Erikek asko jokatzen du, kantxan mugitzera behartzen zaitu, eta horregatik ni hasieratik zentratuta atera beharko naiz kantxara eta nire erritmoa eta jokoa ezarri. Asko dago jokoan, Lau eta Erdiko finala jokatzea, eta dena eman beharra dago” nabarmendu zuen arbizuarrak. Buruz Buruko txapeldunaren kontra jokatzeko ilusioa duela azaldu zuen Ezkurdiak osteguneko material aukeraketan. “Arerio latza da; ezker gantxo oso arriskutsua du eta pilota txokoan uzten oso ongi daki. Aurreko urtean bera mendean hartzea kosta egin zitzaidan, eta aurtengo partidak ez du zerikusirik izango, Erikek asko hobetu duelako. Zaila izango da” azaldu zuen.

“Egun gogorrak” izaten ari direla aitortu du Ezkurdiak
Azken asteak eta egunak oso gogorrak izan direla aitortu du egungo lau eta erdiko txapeldunak. “Oso gogorra izaten ari da, bai buruz eta baita fisikoki ere. Azken egunotan Binakako finalerdia eta finala, bi partida oso gogor jokatu ditut, ondoren Lau eta Erdiko final laurdena, eta kosta egiten ari zait buelta ematea, gorputzez eta psikologikoki, baina aurrera egin behar da. Beste urte batez Lau eta Erdiko finalerdietan egotea lortu dugu eta ea iganderako topera nagoen”.

Jakarendako Ezkurdia lau eta erdiko espezialista hutsa da
Atzo, osteguna, aukeratu zuten materiala eta saskian topatu zutenarekin pozik azaldu ziren Ezkurdia eta Jaka. Biek antzeko pilotak aukeratu zituzten. Jakak nabarmendu zuen Ezkurdia eta Jokin lau eta erdiko espezialista hutsak direla. “Ezkurdia oso ongi egokitzen da lau eta erdira, dena ongi egiten du eta arerioari aukera gutxi ematen dizkio. Josebaren abiadurari aurre egiteko bera baino abiadura gehiago ematea, ez dago besterik. Berak egiten duena egiten eta angeluak ongi bilatzen saiatuko naiz” azaldu zuen. 

Jaka: "Ezkurdia lau eta erdiko espezialista hutsa da; oso ongi egokitzen da lau eta erdira, dena ongi egiten du eta arerioari aukera gutxi ematen dizkio"

Ezkurdiak Buruz Buruko txapeldunaren kontra jokatzeko ilusioa duela azaldu zuen. “Arerio latza da; ezker gantxo oso arriskutsua du eta pilota txokoan uzten oso ongi daki. Aurreko urtean bera mendean hartzea kosta egin zitzaidan, eta aurtengo partidak ez du zerikusirik izango, Erikek asko hobetu duelako. Zaila izango da” azaldu zuen. Igandean ikusiko da nor sailkatuko den abenduaren 27an Bilbon jokatuko den finalerako. 

 Beste finalerdiko faboritoa Altuna da, baina Bengoetxea VI.ak finalean egoteko aukerari ez dio muzin egingo; leitzarra oso gogotsu dago, sorpresa eman nahi du eta gauzak oso zail jarriko dizkio gipuzkoarrari. Zalantzarik gabe, bi partida handien atarian gaude.