Ekainaren 20an Atarrabi Trail mendi lasterketa jokatu zen, bi distantziatan: Bimendi (14 km, 800 m desnibel +), Oihana eta Larzabal mendiak gainditzen zituena, eta Hirumendi (25 km eta 1800 m desnibel +), Antxoriz, Berrondo eta Larzabal bezalako igoerak jasotzen zituena.
Hirumendi Trailean (25 km) Aitor Blanco Urmeneta izan zen garailea (2:31:55). Ion Solari ia bi minutuko aldea atera zion (2:33:42). 8. eta 9. postuetan Javier Gasanz eta Jokin Bereziartu sailkatu ziren, denbora berean (2:50:30). Hain zuzen ere, Dantzaleku Sakana Klubeko altsasuarrak izan ziren Bikotekako Txapelketa irabazi zutenak. Emakumezkoetan Ainara Alkuaz (3:08:14) gailendu zitzaion Naiara Irigoieni (3:21:43). Iñaki Zabaleta (Sakana Bizirik) 51. sailkatu zen (3:17:30), Santi Galarza (Dantzaleku) 64. (3:24:31), Jorge Iradi (Dantzaleku) 77. (3:29:08) eta Karlos Ondarra 90. (3:32:10).
Bimendi Trailean (14 km) Aimar Azpiroz (1:11:58) eta Nuria Mendivi (1:29:40) izan ziren txapeldun handiak. Sakandarrei dagokienez, Joseba Galarza (Dantzaleku) 26. sailkatu zen (1:26:40) eta Aralar Mendi taldeko Jose Javier Beregaña eta Itziar Retegi 96. eta 97. postuetan, denbora berean (1:43:43).