Otsaportilloko omenaldia 1936

Memoria tokia sendotzen

Otsaportillon 1936ko estatu kolpearen ondoren errepresio motaren bat pairatu zuten guztiak gogoan izan zituzten igandean.

Arakilgo eta Irurtzungo udalek izan dute aurtengo ekitaldia antolatzeko aukera. Hartan hitza hartu zuten Eduardo Murugarren Francesek (Irurtzungo zinegotzia), Oihana Olaberria Jakak (Arakilgo alkatea), Aitor Larraza Carrerak (Irurtzungo alkatea), Guillen Abrego eta Gorka Hamza Olliver (CNT-ko kideak) eta Ana Ollo Hualde (Herritarrekiko Harremanetarako kontseilaria).

Zuriñe Mayok eta Juan Carlos Aoizek Martxan baten lehen notak pieza jo zuten klarinetearekin eta tronboiarekin. Maite Mene kantariak bere abesti bat eta Beberen Razones kanta abestu zituen. Luis Quintanaren kontrabaxuaren doinura Urko Mauduitek aurreskua dantzatu zuen, jendeak lore eskaintza egin baino lehen. Aurretik, Mayo eta Aoizen musika laguntzarekin, Nerea Baldak poesia bat errezitatu zuen. 


Ezinegonak
Ezinegon batzuek
ez dute oraindik izenik
Hutsarte batzuk ez ditu orbelak estaltzen
Jakin nahiak ez dira euri langarretan lurruntzen 

Egonezin batzuk
gogoan fosiltzen dira
Eta harrizko labar bilakatu 

Ezinegon batzuek

sutondoan batzen gaituzte

Izan ginenari buruzko istorioak xuxurlatzen dizkigute
Nor garen ulertarazten 

Egonezin batzuek

bide orriak idazten dituzte geure baitan
Memoria garela esaten digute
Zapatetan bildutako hartxintxarrez 

Ezinegon batzuk

Oroimen eta akorduz erditzen dira
Baina orainean eraikitzen gaituzte 

Izenik gabeko ezinegon horiek
Horiexek

egiten gaituzte