Ezkurdia, Lau eta Erdia helburu

Guaixe 2021ko ira. 28a, 14:54
Bilbon egin dute Lau eta Erdikoaren aurkezpena. ASPE

2021eko Lau eta Erdiko Txapelketa aurkeztu dute Bilbon. Ezkurdia izango da ordezkari sakandar bakarra, eta urriaren 9an sartuko da lehian, larunbatean Lasok eta Peñak jokatuko duten partidaren irabazlearen kontra

Udako torneoak bukatu berri, eta atzo, asteartean bertan aurkeztu zuten 2021eko Lau eta Erdiko Pilota Txapelketa, hilabete eta erdi eskasean erabakiko dena. Txapelketa asteburu honetan bertan hasiko da eta Joseba Ezkurdia izango da Sakanako ordezkari bakarra. 

Asteburu honetan final zortzirenak jokatuko dira. Ostiralean, Artolak Elordi izango du aurkari Mallabian, eta irabazleak Altuna III.a izanen du zain urriaren 10ean Eibarren jokatuko den partidan. Larunbatean, Donostian, Laso eta Peña lehiatuko dira, eta irabazleak Joseba Ezkurdiaren kontra jokatu beharko du urriaren 9an. Igandean, Lekeition, Urrutikoetxearen eta Victorren kontrako partida jokatuko da, eta irabazlea Jakaren kontra lehiatuko da urriaren 12an. Bukatzeko, astelehenean, Etxeberriaren eta Elezkano II.aren kontrako partida hartuko du Tolosako Beotibarrek. Irabazleak Bengoetxea VI.a izanen du zain urriaren 8an Balmasedan jokatuko den partidan. 

Finala azaroaren 14an jokatuko da, Bilbon.