Igandean VII. Abadiño Udala Saria Ziklo-krosa jokatu zen. Euripean eta lokatzaz gainezka, Gorka Izagirre Insaustik (Astana), sekulako lezioa eman zuen eta azkarrena izan zen, 3 kilometroko zirkuituari sei itzuli eman eta helmugara bakar-bakarrik helduta (1:02:59). Ia minutura sartu zen Gonzalo Inguanzo (Supermercados Froiz, 1:03:41).
Gainontzekoak
Junior mailan lau itzuli egin behar izan zituzten eta Fantin Gloux izan zen txapelduna (46:12). Quesos Albeniz-Burunda taldeko Mikel Regil Fernandez altsasuarra hemeretzigarren sailkatu zen (51:16). Kadete mailan hiru itzuli zituzten aurrez aurre eta Luyando taldeko Hodei Muñoz Gabiña gailendu zen (35:04). Quesos Albeniz-Burunda taldeko Ekain Imaz Perez podiumera igotzear egon zen, laugarren sailkatu baitzen (35:58).
Larunbatean Garain
Egun bat lehenago, Garaiko II. Ziklo-kros Sari Nagusia jokatu zen eta bertan Quesos Albeniz-Burunda taldeko zenbait txirrindulari lehiatu ziren. Junior mailan 2,9 kilometroko zirkuituari lau itzuli egin zizkieten eta Suministros Zadorrako Gorka Corres sailkatu zen lehena (39:16). Mikel Regil Fernandez Top-Tenean sailkatu zen, hamargarren postuan (42:13). Kadeteetan hiru itzuli zituzten aurretik eta Logos Team taldeko Iker Diaz nagusitu zen (31:59). Ekain Imaz Perez hamaikagarren postuan sartu zen (34:44), Iker Begiristain Andueza 32. postuan (40:59) eta Hegoi Garcia Duran 36. postuan (42:15).