Astekaria

D ereduan aurrerapausorik ez

Ikasleak kiroldegian. ARTXIBOA

Azken zazpi ikasturteetan ikasleen %81 inguru D ereduan matrikulatu dituzte gurasoek. Aurten %81,6 dira. Aurretik zetorren goranzko progresioa etenda dago. Ikasturte honetan gora egin duen eredu bakarra A izan da, puntu bat gora. Sakanako ikastetxeetan 2.854 ikasle daude aurreko ikasturtean baino 13 gehiago. 

Sakanan hegemonia duen hizkuntza gaztelania da. Euskararen normalizazioaren aldeko tresna onenetako bat irakaskuntzako murgiltze eredua da, D eredua. Haren bidez haur eta gazteek euskara ezagutzen dute. Hala adierazten dute hezkuntzako eta soziolinguistikako adituek ere. Horregatik, Sakanan ofizialak diren bi hizkuntzak ikasteko modurik onena D eredua dela nabarmendu dute. Euskara Zerbitzutik gurasoak D eredua ezagutzera gonbidatu dituzte. Eta gainontzeko sakandarrei beraien inguruan D ereduaren alde onak nabarmentzeko. 

Sakanako Mankomunitateko Euskara Zerbitzuak ibarreko ikastetxeetako matrikulazioa kontutan izanik, hizkuntza ereduen bilakaeraren berri eman du. Horien arabera, Sakanako ikastetxeetan gora egin duen eredu bakarra A eredua da, gaztelaniazko klaseak eta euskara ikasgai duena. A ereduak puntu bat egin du gora eta gaur egun ikasleen %14,8 dira eredu horretan ikasten dutenak. Bestalde, murgiltze ereduak, D eredua, 0,9 puntuko jaitsiera izan du. Ikasleen %81,6 dira euskaraz ikasten ari direnak. Datua 2015-2016 urtekoaren parekoa da (%81,4 orduan). Ikasturte hartan gainditu zuen murgiltze ereduak estreinakoz matrikulazioaren %80ko langa. Baina ordutik gora eta behera egin du  kopuruak, baina sekula %82,5etik gora egin gabe. Bestalde, B ereduak, gaztelania eta euskara irakasteko baliatzen duena, 0,1 egin du behera. B ereduan ikasleen %3,6 ikasten ari dira.

Ikasturteak ekarri duen beste berritasuna da Uharte Arakilgo eskolan A eredua desagertu dela. Ikastetxe horretan murgiltze eredua besterik ez dago gaur egun. Hortaz, A eredua Irurtzunen eta Altsasun eskaintzen da, eta B eredua Altsasun.

Zikloka
H

aur Hezkuntzak ibarreko ikasleen %20,39 hartzen ditu, 582 ikasle, aurreko ikasturtean baino sei ikasle eta 0,3 puntu gutxiago. Murgiltze ereduan ikasleen %86,1 daude (501 ikasle, zazpi gutxiago). Aurreko ikasturtearekin alderatuta D ereduak 0,3 puntu egin du behera. 2020-2021 ikasturtean A ereduak berriro bi zifrako matrikulazioa lortu zuen Sakanan, %10. Ikasturte honetan kopurua errepikatu du 58 ikaslerekin (aurrekoan baino bat gutxiago). Azken bi urteetako joera etenez, B eredua da ehunekoan eta kopuruan gora egin duen eredu bakarra. Ibarreko ikasleen %3,9 ari dira ikasten eredu horretan (0,3 puntu eta 2 ikasle gehiago).  

Lehen Hezkuntza ikasten ikasleen %48,24 ari dira, 1.377 guztira, aurreko ikasturtean baino 55 ikasle eta 2,16 puntu gutxiago. Euskarazko murgiltze ereduan ikasleen %81,8 daude (1.126 ikasle, 39 gutxiago), aurreko ikasturtean bezala 0,4 puntu egin du gora kopuruak. A ereduan ikasleen % 12,4 daude, aurreko ikasturtean baino 0,3 puntu gutxiago (171 ikasle, 11 gutxiago). Azkenik, B ereduan joan den urtean hartutako beherako joerari segida eman dio 0,1 puntu galduz, ikasleen %5,8 ari dira B ereduan ikasten (80 ikasle, 5 gutxiago). 

Derrigorrezko Bigarren Hezkuntzan ikasleen %31,36 ari da ikasten, 895, aurreko ikasturtean baino 74 ikasle eta 2,46 puntu gehiago. Aurreko ikasturtean estreinakoz DBHn D ereduan matrikulatutako ikasle sakandarren kopuruak %80ko langa gainditu zuen. Ikasturte honetan euskarazko murgiltze ereduan ikasten ari direnak %78,4 dira. 31 ikasle gehiago badaude ere, aurreko ikasturtearekiko euskarazko ereduaren matrikulazioa 3,3 puntu jaitsi da. DBHn ez dago B eredurik eta behe mailetan eredu horretan ikasi duten ikasleek DBHra iristerakoan gurasoek, normalean, A ereduan matrikulatzen dituzte, euskararen kaltetan. Eta ikasturte hau ez da salbuespena izan. Ikasleen %21,6 daude eredu horretan, aurreko urtean baino 43 ikasle eta 3,3 puntu gehiago.