Sakanan abesbatza ospetsuak ditugu. Altsasuko Erkudengo Ama abesbatza, berrogei urteko historia ospatuko du aurten. Edo Etxarri Aranazko Abesbatza, hirurogeita hamarreko hamarkadan parrokiako korutik sortu zena. Berriena Irurtzungo Abesbatza da, 2006an sortua. Hiru abesbatzek 2013an Fran Idaretaren Taupadak ekitaldian parte hartu zuten.
Antzerkian edo operan abesbatzak herria ordezkatzen du. Koru misto batean, herri baten antzera, ahots ezberdinak daude: sopranoa, kontraltoa, tenorrak eta baxuak. Ahots bakoitza desberdina da, baina guztiek aldi berean abesti bera abesten dute. Horregatik, koral bat entzuten dugunean, multzo harmoniko bat iristen zaigu, konposizio polifoniko bat.
Sakanako herri askotan parrokiako abesbatzak daude, non adin eta ideologia ezberdinetako pertsonek kantuan denbora pasatzen duten. Koru hauek elkar ulertzeko gune bat dira. Ordu batzuetan eztabaida politikoak edo familiarrak ahazten dira eta denak ados jartzen dira abesti bera abesteko eta abesbatzako zuzendariari kasu egiteko. Emaitza ahots ezberdinen multzo harmoniko bat da.
Herriko abesbatza, beraz, uharte bat da begirada okerren itsasoan. Baita topaketa errazteko modu bat ere, hau da, topaketa errestauratiboa.
Beste egun batean zehatzago hitz egingo dugu justizia errestauratiboaz; Maixabel filma adibide bat da. Orain aipatuko dudan gauza bakarra da taldean egiten diren justizia errestauratiboaren topaketak hainbat teknika erabiltzen dituztela elkarrizketa errazteko; pintura, jolasak, eta abar. Eta baita abesbatza bat ere, zergatik ez.