Koronabirusa Sakanan

Konfinamendurik gabeko ikastetxeak

Iñigo Aritza ikastolan mugikortasuna arautzeko geziak lurrean margotuta. ARTXIBOA

Ostiralaz geroztik ikastetxeetan ez dago taldeen konfinamendurik. COVID-19 gaitzari aurre egiteko prebentzio neurria zen.

Hezkuntza Departamentuak Nafarroako ikastetxeei zirkular bat bidali zien ostiralean, Lurraldearteko Osasun Kontseiluaren Osasun Publikoaren Batzordean hartutako erabakiaren berri emateko. Erabaki horren bidez, ostiralaz geroztik eskola-eremuko berrogeialdiak kendu dira. Hau da, ostiralaz geroztik eskola-taldeen konfinamendua adierazteari utziko zaiola, orain arte indarrean egon den eskola-eremuko kasu positiboak eta kontaktu estuak kudeatzeko prozeduran jasotzen zen bezala.

Nolanahi ere, Hezkuntza Departamentuak ikastetxeetako zuzendaritzei gogorarazi die transmisioa prebenitzeko neurriak funtsezkotzat jotzen direla eta, horregatik, azken azalpenaren ondorengo hamar egunetan, baieztatutako COVID-19 kasuen kontaktu estuek kontu handiz ibili behar dutela eta ahal den neurrian murriztu behar dituztela interakzio sozialak maskara etengabe erabiliz eta eskuen higiene egokiari eutsiz. Bereziki saihestu behar da pertsona ahulekin kontaktua izatea. Hala adierazten dute Osasun Publikoaren Batzordeak 2022ko martxoaren 1ean hartutako erabakiek.