Egiarretako Itxasperriko Santiago ermita, atzera ere, arakildarren bilgune bihurtuko da igandean. Ohi bezala, eraikin erromanikoak ibarreko hildakoen aldeko elizkizuna hartuko du. Meza 12:00etan izanen da. Hura despeditu ondoren arakildarrak elkarrekin hitz egiten geldituko dira ermita inguruan. Gainera, udalak otamena eskainiko du.
Arbizuarrek, festez aparte, urteko lau egunetan egiten dituzte aateak: maiatzaren 15ean, San Isidro; irailaren 8an, Ama Birjinaren eguna; irailaren 29an, San Migel eta, azkenik, lastailaren 12an, Pilarekoa. Igandea San Isidro denez, aatea izanen da plazan, 20:00etan. Edatekoarekin batera taloak dastatzeko aukera ere izanen da.
Lizarragabengoan ere nekazarien zaindariaren eguna herritarrak elkartzeko aitzakia izanen da. 20:00etan auzatea izanen da Bordatxo elkartearen ondoan. Lehen sektoreak indarra galdu zuenean auzatean herritarrak elkartzeko ohitura galdu zen, baina 2017an berreskuratu zuten jan-edanaren inguruko topaketa.