Energiaren eta erregaien prezioen igoera etengabearen ezohiko egoera bat bizi du Europak. Testuinguru horretan Espainiako Gobernuak iragarri zuen berak kudeatzen dituen garraiobide publikoak (Renfe) doan edo erdi prezioan erabiltzeko aukera izanen zela irailaren 1etik urtea despeditu arte. Bestalde, tokiko erakundeen edo autonomia erkidegoen eskumena garraiobideek, berriz, %30eko deskontuak ezarri dituzte. Txartelaren prezioan dagoen aldea Espainiako Gobernuak ordainduko du.
Neurri horien helburua da garraio publiko kolektiboa sustatzea eta ibilgailu pribatuaren erabilera murriztea, ″energia mendekotasuna eta karbono aztarna gutxitzen laguntzeko″. Aldi berean, ekimenak garraio publiko kolektiboa ″eguneroko mugikortasuna bermatzeko, garraiobide seguru, fidagarri, eroso, ekonomiko eta jasangarria″ dela erakutsi nahi du.
Autobusak eta trenak
Nafarroako Gobernuak jakinarazi duenez, sakandarrek La Burundesa enpresaren autobus zerbitzuen bonuen zerbitzuan %30eko murrizketa eskuratu dezakete. Prezioaren gaineko hobaria ostegunean sartu zen indarrean eta urte bukaera arte indarrean izanen da. Hala ere, erositako abonamenduko bidaiak 2023ko ilbeltzaren 31ra arte egin ahalko dira. Enpresatik azaldu dutenez, garai bateko abonamendu fisikoen ordez bonu birtualak dira saltzen ari direnak, telefono mugikorrean eramateko modukoak. La Burundesatik zehaztu dutenez, familia anitzeko karneta dutenek %30eko deskontua eta familia anitza izateagatik dagokien deskontua batzeko aukera izanen dute. Bestalde, Iruñerriko autobus zerbitzuko erabiltzaileek garraio-txartelean hobaria izanen dute.
Trenei dagokienez, ostegunetik urte bukaera arte, Renferen aldiriko trenetan (Goierriko herrietako linea, esaterako) eta distantzia ertainekoetan (Hego Euskal Herriko lau hiriburuak beraien artean eta Mirandarekin, Zaragozarekin eta Santanderrekin lotzen dituzten lineak) aplikatuko da neurria. Bi abonuak doakoak dira, baina lehenengoaren kasuan 10 euroko bermea jarri behar da eta bigarrenean 20 eurokoa. Bermeak automatikoki bueltatuko dira baldin eta lau hilabeteetan 16 bidaia baino gehiago egiten badira. Bestetik, distantzia ertaineko abiadura handiko trenen abonu guztien prezioan % 50eko murrizketa dago. Baina erosteko aldez aurretik izena eman behar da www.renfe.com webgunean edo Renferen aplikazioetan.
| Burundesaren garraio txartelen deskontuak | |||
| Ibilbidea | Bidaia kopurua | Prezioa | Deskontuarekin |
| Uharte Arakil - Iruñea | 20 | 67 | 46,9 |
| Gazte garraio txartela | 20 | 54 | 37,8 |
| Lakuntza - Iruñea | 20 | 77 | 53,9 |
| Gazte garraio txartela | 20 | 62 | 43,4 |
| Arbizu – Iruñea | 20 | 81 | 56,7 |
| Gazte garraio txartela | 20 | 65 | 45,5 |
| Etxarri Aranatz - Iruñea | 20 | 87 | 60,9 |
| Gazte garraio txartela | 20 | 70 | 49 |
| Urdiain – Iruñea | 20 | 91 | 63,7 |
| Gazte garraio txartela | 20 | 73 | 51,1 |
| Altsasu – Iruñea | 20 | 103 | 72,1 |
| Gazte garraio txartela | 20 | 82 | 57,4 |
| Altsasu – Gasteiz | 20 | 89 | 62,3 |
| Gazte garraio txartela | 20 | 70 | 49 |
| Olatzagutia – Iruñea | 20 | 109 | 76,3 |
| Gazte garraio txartela | 20 | 87 | 60,9 |
| Iruñea - Gasteiz | 20 | 192 | 134,4 |
| Gazte garraio txartela | 20 | 154 | 107,8 |
| Iruñea – Ubarmin | 24 | 21,6 | 15,12 |