Asteburuan Preferente mailako zazpigarren jardunaldia jokatu zen, Sakanako taldeetan punturik utzi ez zuen jardunaldi gogorra.
Altsasuk Soto Ibarbaso taldea hartu zuen igandean Dantzalekun. Soto Ibarbaso 14. minuturako aurreratu zen, baina Altsasuk ongi eutsi zuen eta Jose Joaquin Montoyak berehala lortu zuen banako berdinketaren gola. Bi taldeen arteko lehia bizia izan zen, eta atsedenaldia baino lehen 2 eta 1 aurreratu zen Altsasu, Montoyak penaltiz sartutako gola. Tamalez, bigarren zatiaren bukaeran partida hankaz gora jarri zuen Soto Ibarbasok. 68. minutuan Lezkairukoek bina berdintzea lortu zuten, eta hortik aurrera bi taldeak garaipenaren bila erasoan aritu ziren. Azken minutuak zoramena izan ziren, eta 83. minutuan Soto, penaltiz, 2 eta 3 aurreratu zen. Berdinketa lortzen saiatu zen Altsasu, baina 90. minutuan laugarren gola sartu zuen Soto Ibarbasok eta Lezkairukoek partida erabakita utzi zuten.
Etxarri Aranatzi azken segundoan egin zion ihes partidak. Etxarriarrek Burlatan jokatu zuten, Burlades B taldearen kontra. Gauzak ongi hasi ziren sakandarrendako, zorigaiztoko jokaldi batean Burlatak ate propioan gola sartu eta Etxarri aurreratu baitzen. Atsedenaldira gol abantailarekin joan zen Etxarri Aranatz, baina bigarren zatia hasi eta berehala Burlatak bana berdindu zuen. Hala ere, etxarriarrek ez zuten etsi eta 71. minutuan Mattin Altzelaik 1 eta 2 aurreratu zuen Etxarri. Bi taldeek borroka estuan jarraitu zuten, Burlatak bina berdindu arte. Eta azken minutuetan sortu zen nahasmena. 85. minutuan Etxarrik eta Burlatak gol bana sartu zuten, eta hiruna berdinduta iritsi ziren azken txanpara. Partida berdinduta bukatuko zela zirudienean, 90. minutuan Burlatak garaipenaren gola sartu zuen eta etxarriarrek jota eta punturik gabe bukatu zuten.
Bukatzeko, Lagun Arteak Valle de Egües B taldea hartu zuen Zelai Berrin. Bi taldeek ongi jokatu zuten, baina Lagun Arteari partida berehala maldaz gora jarri zitzaion, 21. minutuan Iñigo Vallejosek Valle de Egües aurreratu baitzuen. Lakuntzarrak partidari buelta ematen saiatu ziren, baina ezin, eta bukaerara aldera, 84. minutuan, Iñigo Vallejosek Valle de Egüesen bigarrena sartu zuen. 0 eta 2 galduta, hiru puntuak Iruñerrira joan ziren.
Sailkapena
Preferente mailak lider berria du, Beti Casedano (17 puntu), orain arteko lider Universidad de Navarra bigarren dela, puntu berberekin. Altsasu zazpigarren postura jaitsi da (11 puntu), Etxarri Aranatz hamaikagarren postuan dago (9 puntu) eta Lagun Artea hamazazpigarren da (3 puntu).
Datorren jardunaldian Valle de Egües B izango du aurkari Altsasuk, larunbatean 15:30ean Sarrigurenen. Etxarri Aranatzek larunbatean, 16:00etan Aibares taldea hartuko du San Donaton eta Lagun Arteak larunbatean Donezteberen kontra jokatuko du, 17:00etan, Iñaki Indart futbol zelaian.