Errigorak hamargarren aldiz antolatu duen kanpainaren bidez Nafarroa hegoalde eta erdialdeko hainbat produktu makina bat etxeetara zabalduko ditu hiru kutxa motetan. Aldi berean, kutxa horien salmentaren %25 eremu bereko euskalgintzari bideratuko diote; ikastolek haurrak euskalduntzen segi dezaten, AEK-k helduen alfabetatzea susta dezan, Sortzen-ek D eredua bultza dezan eta Agerraldiak, bitartekoak izan ditzan eta euskararendako aro berri bat ireki dezan ere.
Udazkeneko kanpainaren leloa da Bat egiteko garaia da. Errigorakoek bat egitearena lau zentzutan ikusten dute. Batetik, badelako garaia euskarak lurraldean mugarik izan ez dezan eta herritar guztiek eskubide berak izan ditzaten. Bestetik, badelako garaia Nafarroa hegoalde eta erdialdeko sektore zabalak euskararekin berradiskidetzeko eta euskararendako aldekotasun berriak biltzeko. Errigorakoen iritziz, eskualdeko ″geografia eta bizitzaren esparru guztietan euskaraz naturaltasunez aritzea dagokigu, euskara eta bizilagunen behar zein interes askotarikoak ekuazioaren batugai bihurtuz gainera″. Agerraldia ″askoren artean, dagoena bultzatuz, eta ez dagoena sortzen″ aritzen dela nabarmendu dute.
Horrekin batera, erdialde eta hegoaldeko euskaltzaleak bat egiteko garaia dela ere iritzi diote Errigorakoek. ″nork bere eremuan eta bere tresnen bidez eremu zabal horretan euskalgintzak izan beharreko lehentasunak adosteko eta norabidea bateratzeko″. Eta, azkenik, ″euskal herritarrek eta eragileek Nafarroarekin bat egiteko garaia″ ere badela uste dute. Errigoraren kanpainak elkartasunaz eta babesaz aparte, eremuko euskalgintzari ekonomia baliabideak eskaintzen dizkiola gaineratu dute.
Kutxak
Aurreko urteetan bezala, Errigorak udazkeneko kanpainan hiru kutxa eskaintzen ditu Nafarroa erdialde eta hegoaldeko 24 ekoizleren produktuz osatuta. Kutxa beltzak 55 euro balio ditu, berdeak (ekologikoa) 65 eta txuriak (berezia) 75. Guztietan heldu den urteko egutegia dago.
Edukia
- Beltza
Oliba olio birjina estra
Orburuak
Zainzuri txuriak
Pikillo piperrak
Ardo botila
Eztia
Kardua
Mahats zukua
Piper mamia
Teilak
Morenitoak
2023ko egutegia - Berdea, ekologikoa
Olio olio birjina estra
Orburuak
Zainzuri txuriak
Pikillo piperrak
Ardo botila
Ardo ozpina
Tomate frijitua
Arroz integrala
Pasta
Konbutxa tea
Teilak
Sagar zukua
Txitxirioak
2023ko egutegia - Txuria, berezia
Olio olio birjina estra
Orburuak
Zainzuri txuriak
Pikillo piperrak
Ardo botila (ondua)
Ardo txuri apartsua
Patxarana
Ardi gasta
Patxaran pastak
Polboroiak
2023ko egutegia
Datuak
- 1.635.000 euro bideratu ditugu eremu horretan euskarari laguntzera Errigorak 2013tik.
- 10.000 kutxa bete zituzten Ablitasen egindako auzolanean larunbatean.