2021-2027 Sakanako estrategia planean hainbat arlo hartzen ditu. Eta horietan genero berdintasunarekin zerikusia duten jarduerak daude jasota. Hori kontuan izanik, Sakanako Enpresen Elkarteak (SEE) ibarreko enpresetan emakumezko eta gizonezkoen arteko berdintasuna garatzeko estrategia landu du. Egoera zein den jakiteko joan den urtean diagnosia egin zuen, "eta ondoriorik garrantzitsuena da Sakanako industria enpresetan emakume gutxi dagoela", azaldu du Laura Garcia Apesteguik, SEEko Giza Baliabideen eta Berdintasun arduradunak. "Borobilduz, 140 enpresa inguruk 4.000 pertsonari ematen diete lana, eta horietatik 700 emakumeak dira. Emakumeak enplegu guztiaren %17 baino ez dira. Batez ere metalaren sektorearen pisu handiari zor zaio hori, enplegu guztiaren %70 inguru baita; oso sektore maskulinizatua izan da beti", gaineratu.
Diagnosiak datu argigarri gehiago utzi zituela jakinarazi du: Sakana generoko soldata arrakala handiena duen Nafarroako eskualdea da, %26, eta Nafarroako batez bestekoa, berriz, %22 da. Garciak jakinarazi duenez, diagnosiak agerian utzi zuen "enpresek berdintasunerako garrantzitsuak diren gaietan gabeziak dituztela. Besteak beste, berdintasun planak, lanpostuetan berdintasunez eta parekidetasunez parte hartzea, emakumeak erantzukizuneko postuetan egotea, ordainsarien erregistroa, jazarpenaren aurkako protokoloa eta abar".
SEEko gerente Javier Artetxe Lopez de Aldak azaldu duenez, "bai enpresaren ikuspegitik, bai gizartearen ikuspegitik, desoreka hori zuzentzeko eta garapen orekatua eta iraunkorra ahalbidetzeko ekin beharko litzateke. Emakumeendako lan aukerarik eza hazkunderako oztopo bat da eta Sakanaren etorkizuna modu negatiboan baldintzatuko du". Gaineratu duenez, enpresetan genero berdintasuna lortzeko epe luzerako estrategia abiarazi dute. "Elkartea enpresekin lankidetzan, berdintasunaren aldeko jarduera bultzatuko dugu, eta berdintasunaren aldeko estrategia baten aldeko lanean lagun dezaketen beste eragile ekonomiko eta sozial batzuen lankidetza bilatu dugu". Aitortu dute orain arte arlo horretan ez dutela lanik egin eta Sakanako Mankomunitatea eta Altsasuko Udala izan direla zerbait egin dutenak.
Estrategia eta pausoak
Garciak azaldu duenez, bi helburu dituzte: "Sakanako industrian emakumeen presentzia handitzea eta enpresetan berdintasunaren aldeko jarduera sustatzea". Horiek lortzeko hainbat neurri hartu dituzte kontuan: informatzea, kontzientziatzea eta sentsibilizatzea, "oso garrantzitsua hasierako etapetan batez ere"; enpresei aholkularitza teknikoa eta espezializatua eskaintzea; enpresetan eta langile guztiendako berdintasunari buruzko prestakuntza sustatzea; enpresekin lan egitea emakumeak hartzeko; industrian dauden enplegu aukerei buruzko informazioa ematea; industria lanbideen aldeko bokazioak hobetzea, eta abar.
Horretarako bi lantalde sortu dituzte. Batetik, Berdintasunerako Kabinete Teknikoa, SEEk eta enpresek (aurten Hydro, Magotteaux, Quesos La Vasco Navarra, Saprem eta Iberica de Suspensiones) osatutakoa. Bestetik, Industriako Berdintasunerako Mahaia gizarte arloko kideez osatua (Sakanako Garapen Agentzia, Cederna Garalur, Mank, Altsasuko Udala osatzen dute. Altsasu, Sakanako herri eskolak, Lanbide Heziketa institutua, Nafar Lansare, LAB eta SEE). Bi taldeak eratu dituzte eta heldu den urterako funtzionamendua, helburuak eta ekintza plana zehaztu zituztela azaldu du Artetxek. Argitu duenez, "2023an hasitako jarduerekin segituko dugu, eta beste jarduera batzuk sartuko ditugu, esaterako, industriarako emakumeen lan poltsa bat, enpresendako berdintasunari buruzko urteko prestakuntza plana, ikastetxeak enpresetara joatea, berdintasunerako bigarren foroa, eta abar". Artetxek zehaztu duenez, jarduera plana zehaztuta, lantaldeek bilerei ilbeltza akaberan ekinen diote, zehaztutako jarduerak martxan jarri asmoz".
SEEk 2021ean diagnostikoa eta aurten estrategia egiteko Nafarroako Gobernuko Ekonomia Garapenerako Departamentuaren dirulaguntza jaso du, SGAren bitartez eta Sakanako Estrategia Planaren jarduera gisa. Garciak argitu duenez, "epe luzeko proiektua denez, eta beharrezkoa denez, datozen urteetan laguntza ekonomikoa beharko dugu lanari jarraipena emateko. Nafarroako Gobernuaren eta Sakanako Garapen Agentziaren babesa izatea espero dugu".