Maiatzaren 26an Nafarroako Erlojupekoko Txapelketa hartu zuen Obanosek. Hiru mailatan jokatu zen: 23 urtez azpian eta eliteetan, junior mailan eta kadeteen mailan.
Afizionatuen mailan, gaztetxoa zela Quesos Albeniz-Burunda klubean trebatu zen Unai Aznar (Finisher) izan zen txapeldun handia, probako 22 kilometroak 29:50 minututan osatu eta gero. Bere taldekide Ibai Azanza bigarren (29:50) eta Hugo Aznar anaia hirugarren (30:24) izan ziren, Finisherrendako hiruko ederra. Andoni Ocaña urdiaindarra (Qoda Construcciones hamahirugarren sailkatu zen (35:12). Emakumezkoetan Sopela Women´s Team taldeko Laia Puigdefabregas gailendu zen (35:55)
Junior mailan 14 kilometroko erlojupekoa zuten aurretik proban sailkatu ziren 44 korrikalariak. Robert Innova taldeko Iker Villar izan zen azkarrena (18:07), Sakana Group-Alea taldeko Adrian Martinez lakuntzarrari 5 segundo aterata (18:12.36). Quesos Albeniz Burundako Iker Gomezek osatu zuen podiuma (18:12.48). Top 10ean sailkatu zen ere bere taldekide Iker Agudelo, sailkapenean bosgarren (18:54). Quesos Albenizko Asier Etxeberria hemezortzigarren sailkatu zen (20:37) eta Iker Begiristain 21. (20:49). Emakumezkoetan Mixele Anton (Nafarroa Ermitagaña) gailendu zen (22:14).
Kadete mailakoek 8 kilometroko distantzia osatu behar izan zuten eta Quesos Albenizko Ekain Imazek hegan egin zuen (11:21), Cafenasa taldeko Xavier Cadenari 14 segundo atera baitzizkion (11:35). Beraz, altsasuarra Nafarroako txapelduna dugu. Top Tenean beste hiru sakandar sailkatu ziren: Sakana Group-Aleako Oihan Gorriti bosgarren izan zen (11:44), Quesos Albenizko Ekaitz Perez seigarren (11:48) eta Sakana Group-Aleako Luca Martinez zazpigarren (11:58).
Hegoi Garcia (Quesos Albeniz) hamahirugarren izan zen (12:24), Janitz Zufiaurre (Sakana Group-Alea) 25. (12:57) eta Mikel Arrizabalaga (Quesos Albeniz) 33. Emakumezkoetan Nafarroa Ermitagañako Paula Ostiz izan zen Nafarroako txapelduna (12:19).