Uztailak 7, San Fermin. Iruñeko festa ezagunenak hasiko dira uztailaren 6an, 12:00etan, eta haiekin bederatzi eguneko ekitaldiz betetako egitarauei hasiera emanen diete ere. Iruñeko Udalak antolatutako egitaraua ez ezik, hainbat elkartek eta erakundek ere haien egitaraua antolatzen dute, esaterako, Takoneran Nafarroa Oinez harira jartzen duten Oinez Txokoa, aurten Andra Mari ikastolaren esku gelditzen dena.
Azterketak euskaraz! Bernat Etxepare Lizeoko ikasleek piztuko dute Oinez Txokoaren txupinazoa uztailaren 6an, 12:00etan. Takonerako Txokoan Sakanako artisten presentzia handia izanen da: uztailaren 7an, 21:00etan, Nerepe kantautore arbizuarraren kontzertua izanen da eta egun berez, 23:30ean, Deserrite Burundako taldearen emanaldia izanen da, Filtterrekin batera. Uztailaren 8an, larunbata, 23:30ean, Nafarroa 1512 talde arbizuarraren kontzertua izanen da, Onki Xin taldearekin batera. Uztailaren 11n, asteartea, Eztanda txarangak girotuko du Takonerako txokoa, 16:30etik aurrera, eta uztailaren 12an, asteazkena, 21:00etan Haizkan hirukote urdindarren kontzertua izanen da, eta 23:30ean, Muga Zero lakuntzarrarenak. Traka finala Beietz talde arbizuarrak jarriko du, uztailaren 14an, ostirala, 19:30ean.
Herriko Tabernak eta Iruñeko Arrano Elkarteak antolatutako egitarauaren barruan uztailaren 13an Altsasuko Elektrokela Elektrotxaragaren emanaldia izan behar zen, baina Herriko Tabernak uztailaren 5ean, San Fermin festen hasieraren bezperan, jakinarai zuen antolatutako programa bertan behera utzi behar izan duela "udaltzaingoa tabernara etorri da, eskaintza kulturalarekin aurrera eginez gero, isuna jarriko digutela esanez. Ekimen bakoitzagatik 6.000 eta 60.000 euro arteko isun zigorrekin mehatxatu gaituzte".
Zabaldu eta Zatozte mesedez.
— Herriko Taberna (@HerrikoTaberna) July 5, 2023
Bertan itxarongo zaituztegu! pic.twitter.com/nCLVrBjkY4
Bestetik, Eneko Lazkoz bertsolari etxarriarrak Iruñeko Udalak antolatutako uztailaren 10eko, astelehena, Bertso jaialdian parte hartuko du, Endika Legarra, Nerea Ibarzabal eta Saioa Alkaizarekin batera. Jaialdia 19:00etan izanen da, Sarasate pasealekuan, eta gai jartzailea Ander Aranburu izanen da.
Sakanako artistak San Ferminetan
Uztailak 7 ostirala
21:00, Oinez Txokoa
Nerepe kantautorea
23:30, Oinez Txokoa
Deserrite taldea
Uztailak 8 larunbata
23:30, Oinez Txokoa
Nafarroa 1512 taldea
Uztailak 10 astelehena
19:00, Sarasate pasealekua
Bertso jaialdia: besteak beste, Eneko Lazkoz
Uztailak 11 asteartea
16:30, Oinez Txokoa
Eztanda Txaranga
Uztailak 12 asteazkena
21:00, Oinez Txokoa
Haizkan taldea
23:30, Oinez Txokoa
Muga Zero taldea
Uztailak 14 ostirala
19:30, Oinez Txokoa
Beietz! taldea