TOKIKOMek Euskal Herri osoko euskarazko 78 toki komunikabide batzen ditu, herriz herriko eta eskualdez eskualdeko eguneroko informazioa batzen dutenak (GUAIXE horien artean dago). Sariarekin, EiTBk TOKIKOMen 10 urteko ibilbidea nabarmendu nahi izan du, eta euskarazko hedabideen esparruaren alde egindako lana aitortu. Toki komunikabideen lanaren garrantzia azpimarratzeaz gain, TOKIKOMek elkarlan eredu berriak garatu ditu, tartean EITBrekin berarekin, sektorearen hedapena sustatzeko eta etorkizuneko erronkei aurre egiteko.
TOKIKOMen eta EiTBren arteko elkarlan hori hainbat ekimenen bidez gauzatzen da gaur-gaurkoz. Hala, TOKIKOMeko hainbat komunikabidetako kazetariek Euskadi Irratiko BAIPASA magazinean astero parte hartzen dute, tokian tokiko ekimenen berri emateko. SARETZEN proiektuaren bidez, berriz, EiTBko zein TOKIKOMeko kazetariek datu-kazetaritzaren inguruko lanketa egiten dute elkarrekin. Eta PRIMERAN ikus-entzunezko plataformaren garapenean ere elkarlan estua izaten ari da bi taldeen artean, toki komunikabideen ikus-entzunezko edukiak plataforman eskuragarri egon daitezen.
TOKIKOMeko zuzendariak, Alaitz Artolazabalek, eta presidenteak, Iban Arantzabalek, jaso dute saria. Biek ere pozez eta eskertuta hartu dute saria. Alaitz Artolazabalek nabarmendu duenez, "EiTB bezalako enpresa handi batek TOKIKOMen txikitik egiten dugun ahalegina aitortu izana oso berri pozgarria da, honelako jaialdi batean euskara hutsezko hedabideak aitortzea pozgarria den bezalaxe". Iban Arantzabalek, bere aldetik, azpimarratu du "globalizazioaren aroan, zero kilometroko komunikazioak inoiz baino garrantzi handiagoa duela gizarte demokratiko eta kohesionatua bermatzeko, eta zeregin horretan ezinbestekoa dela euskal hedabideen arteko lankidetza. Tokian tokikoak komunitate biziak dira, eta komunikazio gertuko eta fidagarriak behar dituzte".
30 bazkide, 78 toki komunikabide, 250 langile
TOKIKOM 30 bazkidek osatzen dute, guztira 78 toki komunikabide kudeatzen dituztenak. 250 langilek baino gehiagok dihardute bertan, Zero kilometroko komunikazioa lantzen: gertuko komunitatearekin bat eginda, informazioa bertatik bertara lantzeko, inguruko norbanako eta entitateekiko konpromisotik, modu zintzo eta profesionalean. Informazioa bertatik bertara lantzen du bitartekaririk gabe, iturriak kontrastatuz eta zurrumurruei bidea itxiz. TOKIKOMeko hedabideak kolore eta joera guztietarako biztanleengana heltzen dira. Eraginkortasunez eta baliabideei ahalik eta atarramendu handiena ateraz, konpromisotik eta komunitatea bera hobetzeko ahaleginean ale bat gehiago jarriz.