Ikastetxean kalitate kudeaketa sistema diseinatu eta ezarri duten eskola publikoek aitortza jaso zuten ilbeltzaren 26an. Aitortza jaso zuten 33 ikastetxeen artean hiru sakandar zeuden. Lakuntzako herri eskolak Kalitatezko Zentroa aitortza jaso zuen. Etxarri Aranazko San Donato eta Altsasuko Zelandi eskolek, berriz, beraien Kalitatezko Zentro aitortza berritu zuten.
Kalitate kudeaketa sistema horiek Hezkuntza Departamentuaren araudiari jarraituz prestatu dituzte ikastetxeetan. Gobernutik adierazi zutenez, “bikaintasunak eta kalitateak gora egiten jarraitzen dute hezkuntza publikoan”. Carlos Gimeno Gurpegi Hezkuntza kontseilariak nabarmendu zuenez, "ikastetxe guztiek egiten duten ahalegina etengabeko hobekuntza sistema baten alde, irakaskuntza eta ikaskuntza prozesuetan". Jakinarazi zuenez, "sistema horretan, Nafarroako etapa eta hizkuntza eredu guztietako 123 ikastetxe daude (sare publikoko ikastetxe guztien %50 baino gehiago), kalitate kudeaketa sistema ezartzeko eta mantentzeko programan parte hartuz".
Gimeno kontseilariak eskerrak eman zizkien ikastetxeetako zuzendaritza taldeei eta kalitate arduradunei, Nafarroako ikastetxe publikoen emaitzak hobetu nahi dituen kalitatea kudeatzeko sistema bat garatzeko erakutsitako jarreragatik eta ahaleginagatik. "Ikasleen funtsezko gaitasunak hobetzea", azaldu zuen kontseilariak, "elkarbizitza giroa, berdintasuna eta inklusioa, ekitatea eta bikaintasuna zuen ikastetxeetan, lege, gizarte eta demografia aldaketekin, zuen sistemak eta egoera berriei erantzuteko zuen gaitasuna proban jarrita. Beraz, bi esker, azkar erabakitzeagatik eta gizartearen aldaketa zorabiagarrietara egokitzeagatik", gaineratu zuen.
Jatorria
Departamentuko arduradunek gogorarazi dutenez, kalitatezko proiektua zuzendaritza-taldeen lidergoa bultzatzeko eta ikastetxeen kudeaketa hobetzeko ahaleginean zebiltzan sei zuzendariren ezinegonari eta grinari esker sortu zen. Kalitatezko sare horiek Nafarroako eremu geografiko, etapa eta hizkuntza-eredu guztietako pertsonek eta klaustroek egindako lana sendotuz joan dira 20 urte baino gehiagotan.
Hezkuntza da proiektuaren buru, Antolamendu, Prestakuntza eta Kalitate Zerbitzuaren eta Hezkuntza Ikuskaritzako Zerbitzuaren bitartez, ikastetxeen arauaren diseinuaren eta ebaluazioaren arduradun diren aldetik, nazioarteko kudeaketa-arau eta -ereduetan oinarritutako berezko kudeaketa-sistema duen eta gure gizartean gertatzen diren aldaketekiko malgua den proiektu batekin.
Guztira 75 ikastetxek, kalitate sareetan integratutako ikastetxeen %61ek, beren kudeaketa sistemen aitortzak lortu dituzte, Hezkuntza Departamentuaren kalitate arauaren arabera. 2020an argitaratu zen arau horren hirugarren bertsioa, Europako eta nazioarteko kudeaketa arauen eta ereduen arabera diseinatua eta azken urteetako gizarte aldaketetara eguneratua.