Adineko pertsonen bakardade arriskua murrizteko gizarte berrikuntzako Teknoadineko Landalab proiektua garatzen ari dira Sakanan joan zen urteko apiriletik. Auzo zaintzaile proiektu pilotua landa eremuetan gizarte zerbitzuak indartzeko asmoarekin sortu da, adinekoak beren etxeetan ahalik eta denbora gehien egon daitezen, behar den bizi kalitatearekin. Horretarako, modu berritzailean konbinatzen ditu datuak aztertzeko eta geoerreferentziaziorako estrategia teknologikoak, eta, aldi berean, gizarte zerbitzuekin lotutako komunitate zaintza tradizionaleko dinamikak bultzatzen ditu. Teknoadineko Landalab, zaintza eta lankidetza publiko komunitarioaren Auzosare ereduaren barruan kokatzen da.
Faseak
Diagnostiko fasean, bakarrik bizi diren adineko sakandarren nahiak eta beharrak jaso dituzte, eta interesdunei eta gainerako herritarrei galdetu zaie. Era berean, proiektuan parte hartzen duten hiru Oinarrizko Gizarte Zerbitzuen Mankomunitateekiko harremana formalizatu da, interakzio irizpideak arautzen dituen hitzarmen baten bidez, eta eremu horretako 21 udaletatik 18 formalki atxiki zaizkio.
Horren ondorioz, talde eragile bat eratu da mankomunitate bakoitzean. Haietan parte hartzen dute: mankomunitateko lehendakaritza, Gizarte Zerbitzuetako eta osasun zentroko erreferentziazko gizarte langileak eta Teknoadineko lantalde teknikoa eta udal ordezkaria. Talde horren zeregina ekintza komunitarioen jarraipena egitea eta baliozkotzea da, Teknoadineko programaren garapena lurraldean jarraitzeko eta engranatzeko ezinbesteko zutabea baita. Hilean behin egiten dira bilerak.
Azken hilabeteetan, lurraldeko erreferenteak sentsibilizatzeko, erakartzeko eta gaitzeko ekintzak ere egin dira: lidergo naturalak dituzten bizilagunak, errekonozimendua eta inplikazioa dutenak, eta laster hasiko dira prestakuntza eta aktibazio ekintzak, proiektuaren agente laguntzaile gisa.
Informazio-sistema bat ezartzea
Gaur egun, lehentasuna da Informazio Sistema Integrala (SII) antolatzea eta ezartzea mankomunitate bakoitzeko Gizarte Zerbitzuetan. SSl tresna arina da, hainbat dimentsiotan erabakiak hartzeko elementu zehatzak ematen dituena. Alde batetik, oro har, zahartzeari eta gehiegizko zahartzeari, feminizazioari, bakarrik dauden adinekoei eta/edo gizarte isolamendurako arriskuan daudenei buruzko datuak ematen ditu, eta, bestetik, maila indibidualean, arriskuan edo gizarte isolamenduan dauden pertsonak aurrez identifikatzen ditu.
SIIa Gizarte Zerbitzuen edo udal errolden datuez hornitzen da, besteak beste. Horretarako, datu horiek eskuratzea eta tratatzea landu da, arlo horretako arau esparruek ezarritakoaren arabera. Apirilean zehar, hiru mankomunitateetan SSl instalatzea aurreikusten da, eta, horren ondoren, mankomunitateetako gizarte langileak trebatuko dira, tresna hori erabiltzeko eta ustiatzeko erreferentziazko figurak baitira.
Horren ondoren, lehen baheketa egingo da, informazio sistema horrek egiten duen aurreidentifikazioan oinarrituta. Sistema horrek bakarrik dauden edo gizarte isolamendurako arriskuan dauden adinekoak definitzen lagunduko du, eta talde teknikoa haiengana hurbilduko da, haien bizi inguruabarrak lehen eskutik ezagutzeko, haien gizarte eta familia laguntzaren indarra baloratzeko eta, hala dagokionean, proiektuan txerta daitezen eskaintzeko.
Sartzen diren adinekoek, beren familiekin batera, ahal den guztietan, erabakiko dute beren inguruneko zein pertsonak egin ditzakeen laguntza-lanak, arreta berezia eskainiko diete eta ikusitako edozein aldaketa edo arrisku-egoera jakinaraziko diete, SIIrekin konektatutako APP baten bidez.
Auzozainen bitartez bizilagunen inplikazioa
Adinekoak auzokide laguntzailerik identifikatzea lortzen ez badu, lantalde teknikoak Teknoadineko pertsonei lotuta izango ditu komunitateko pertsonak, bai profesionalak (medikuak, erizainak, etxez etxeko arreta zerbitzua, eta abar), bai zerbitzu eta saltokietakoak (ostalaritza, elikadura, farmazia, eta abar), bai bizilagunak, laguntza lanak egin ditzakeenak. Kasu guztietan, aurretiko prestakuntza jasoko da, eta harreman mota adostuko da, kontaktuaren intentsitateari eta maiztasunari dagokienez, adineko pertsonaren nahietan oinarrituta.
Komunitatearen inplikazioa funtsezkoa da proiektuaren funtzionamendurako, auzozainen figura baitu (auzoko zaintzaileak). Bakarrik bizi diren adineko bizilagunekin harremanetan dauden boluntarioak dira, eta Gizarte Zerbitzuei egoera kezkagarrien edo arriskua ekar dezaketen egoeren berri emateko konpromisoa hartzen dute, betiere arreta hori ematen dioten adinekoarekin borondatez ezarritako harremanaren esparruan.
Auzozainak izan daiteke adineko pertsonen beharrizanekiko sentikorra den edozein pertsona, merkatariengandik, osasun-langileengandik edo bizilagunengandik. Konpromisoa hartzen dute adineko pertsonaren eguneroko bizitzan gertatzen diren aldaketei arreta emateko, aldaketa horiek haren osasunerako arriskutsuak izan daitezkeenean, eta gizarte-zerbitzuei informazioa emateko, telefono mugikorraren, telefonoaren edo posta elektronikoaren APP baten bidez. Auzozain guztiek Teknoadineko profesional baten laguntza eta babesa dute.
