Sakanako ikasleei eta ibarreko ikastetxeetan ikasten duten haur eta gazteei bideratutako Maria Markotegi literatur lehiaketa martxan da. Sakanako Mankomunitateko Euskara zerbitzuk antolatzen du, euskarazko sormena bultzatzeko asmoz. Apirilaren 7tik 25era aurkez daitezke lanak. Lau sail daude: narrazio laburra, poeisa, komikia eta booktubea (DBHko ikasleak). Ikasleen mailaren arabera lau kategoria daude: Lehen Hezkuntzako hirugarren eta laugarren maila, A; bosgarren eta seigarren mailako ikasleak, B; DBHko lehenengo eta bigarren maila, C, eta DBHko hirugarren eta laugarren mailako ikasleak D kategoria.
Kategoriaren arabera lanek luzera desberdinan izanen dituzte: A kategorian narrazio laburrean gutxienez orrialde bat eta gehienez lau; poesian gutxienez hamar lerro eta gehienez 50, eta komikian gutxienez orrialde bat eta gehienez bi. B kategorian, narrazio laburrean, gutxienez bi orrialde eta gehienez bost orrialde; poesian gutxienez hogei lerro eta gehienez 50, eta komikian gutxienez orrialde bat eta gehienez hiru osatu beharko dituzte.
C kategoriakoek narrazioan hiru eta sei orrialde tartean idatzi beharko dituzte, poesian gutxienez 30 lerro eta gehienez 80 eta komikian gutxienez bi orrialde eta gehienez lau orrialde. Booktube sailean gutxienez 1,5 minutu eta gehienez bi minutuko liburu baten inguruko bideoa egin behar dute. D kategoriakoek narrazioan lau eta zazpi orrialde arteko narrazio laburra, 40 eta 80 lerro arteko poesia lana eta bi eta bost orrialde arteko komikia egin beharko dituzte. Booktubean 1,5 minutu gutxienez eta hiru minutu gehienez iraun beharko du bideoak.
Narrazio laburrak eta poemak ordenagailuz idatzirik aurkeztuko dira, 12 puntuko hizki tamainan. Komikiak zuri beltzean edo koloretan aurkeztuko dira, eta ez dira onartuko ordenagailuz egindakoak. Aholkatzen dute Din A3 tamainakoak egitea, testuak ongi ikusi ahal izateko. Lanak bakarkakoak izanen dira, booktubeak izan ezik.
Lanak goitizen batez izenpetuko dira eta antolakuntzak banatutako plikaren bidez datuak gutun azal batean sartuko dira. Uharte Arakilgo udaletxean aurkeztuko dira. Booktubearen kasuan USB batean.
Maria Markotegi sarietara aurkezten diren lan guztien egileek oroigarria jasoko dute eta kategoria bakoitzean bi sari banatuko dira, liburu denda batean erabiltzeko txartelak; A kategorian 60 euroko txartela, B kategorian 80 euroko txartela, C kategorian 100 eurokoa, eta D kategorian 120 euroko txartela. Sari banaketa ekitaldi publiko batean eginen da.
Nanoipuinak
Euskara ikasleendako eta Mintzakideendako Nanoipuin lehiaketaren edizio berria jarri du martxan ere Sakanako Mankomunitateko Euskara zerbitzuak; hortaz, euskalduntzen ari den Sakanako edozein pertsonak parte har dezake, baita Mintzakide programako parte hartzaileek ere. Hiru maila daude: A1 eta A2 mailetako ikasleak; B1 ikasleak eta B2 eta C1 mailetako ikasleak. Mintzakideak euskararen ezagutzaren pareko mailan parte hartuko dute. Lanak apirilaren 7tik 25era arte aurkez daitezke. Nanoipuin bakoitzak 150 hitz izango ditu gehienez eta egile bakoitzak nahi beste testu aurkez ditzake. sakanamank.eus webguneko Euskara Zerbitzuko lehiaketaren estekaren bidez aurkeztuko dira.
Aurkezten diren lan guztien egileek oroigarria jasoko dute eta maila bakoitzeko saridunek Sakanako liburu dendetan erabili ahal izateko 150 euroko txartela irabaziko dute. Sari banaketa ekitaldi publiko batean eginen da.