Errepidearen arriskuez kexu, Añezkar, Oteiza eta Larragetako kontzejuek Sakana Iruñearekin lotzen duen errepidearen ertzean dauden udal eta kontzejuak bilera batera deitu zituzten. Berriobeitin egin zen bilera eta han izan ziren, besteak beste, Arakilgo eta Irurtzungo udal ordezkariak. Oihana Olaberria Jakak, Arakilgo alkateak azaldu duenez, "udalerri bakoitzari dagokion errepide zatian dauzkagun puntu beltzen zerrenda lehenbailehen egitea adostu genuen”. Elkartutakoen asmoa da N-240-A errepidearen puntu beltzen zerrenda Nafarroako Gobernuari aurkeztea, hark ibilbide guztia azter dezan.
Arakilgo Udalak Aizkorberen kasua sartuko du. Olaberriak azaldu duenez, "beti izan da eskaera. Aldaparen gainaldea da, eta arriskutsua da. Gainera, orain benta zeneko etxebizitzak saldu dira eta bizilagun berriak ditugu, ume txikiekin". Horregatik, Arakilgo Udalak aizkorbearrekin partekatuko du egoeraren azterketa eta egin daitekeena.
Alkateak azaldu duenez, "bidegurutze horretan zerbait egin behar dela ulertzen dugu. Istripuen ondorioz, bere garaian hildakoak izan ziren han" (azkena 2016ko otsailaren 6an). Olaberriak adierazi duenez, "abiadura murrizteko neurriren bat jartzea da garrantzitsuena. Aurretik eskatu izan dugu errepidean motelgarriak jartzeko. Baina ukatu egin ziguten. Beraz, guk eskaera eginen dugu eta konponbide proposamena gobernuak egin dezala". Olaberriak gaineratu duenez, "arakildarroi eta irurtzundarroi eragiten digun bestea Guliako bidegurutzea da. Oso arriskutsua da. Hor beti zerbait gertatzen da".
Aizkorbeko errepide ondoko etxeak. ARTXIBOA
Deitzaileen argudioak
Bilkuraren deitzaileak aipatutako errepidearen trazaduraren arriskuaz gaztigatu dute. Bide segurtasuna handitzeko, besteak beste, bidegurutzeetan biribilguneak egitea, seinaleztapen bertikala eta horizontala hobetzea, zenbait tokitan zoruko seinaleak berriro margotzea eta argiztatzea eskatu dute. Horrekin batera autopistako Zuastiko bidesaria kentzea ere proposatu dute. Deitzaileen iritziz, Gulian kamioi eta auto gidari asko autopistatik ateratzen dira bidesaria ez ordaintzeko. Autopistaren kontzesioa 2029ra artekoa dela gogorarazi dute, eta orduan bidesaria kentzea eskatu dute.
Berriobeiti eta Guliako bidegurutzearen arteko errepideak N-240-A izendapena du. Handik Irurtzunera arteko tarteak, berriz, NA-2409.
Aurrekaria
Duela 25 urte, orduko NA-240 errepideak, 11.000 ibilgailu hartzen zituen, errepidean ibiltzea arriskutsua zen eta Iruñeko sarrera-irteerak egoera tamalgarrian zeuden. Horregatik, errepide bazterreko udal eta kontzejuak antolatu egin ziren. Zenbait herrietarako sarbideak egitea eskatu zuten, baita autopista doakoa izatea, trafikoa handik desbideratzeko. Eskaerarekin bat egin zuten Sakanako Mankomunitateak eta ibarreko udalek. Autopistaren doakotasuna eskatzeko 700 pertsonak manifestazioa egin zuten Irurtzunen 2000ko otsailaren 13an. Ez zuten doakotasuna lortuko, baina gobernuak deskontuak ezarriko zituen gerora.