STOP AHT Zundaketak ekimenak deituta, Altsasu eta Olatzagutia artean mendi martxa egin zen larunbatean. Antolatzaileek nabarmendu zutenez, "Abiadura Handiko Trenaren (AHT) Nafarroako korridorea eta Euskal Y lotzeko erabakia teknikoa izan ordez politikoa da". Salatu dutenez, "lotura posibleen azterketa egiteko aitzakiarekin Iza, Sakana eta Goierrin AHT egiteko abiapuntua liratekeen zundaketak indarrez egin nahi dituzte". Gogorarazi zuten udalek horretarako baimenik ez dutela eman eta STOP AHT Zundaketak Ekimenak berak hainbat jarduera antolatu dituela.
Larunbateko moduko mendi martxak "aukera paregabea izan dira mehatxatutako eremuez ohartzeko, zundaketa saiakeren aurrean adi egon eta erantzuteko adostu den protokoloa ezagutarazteko, eta AHTren kontra mugimendua saretzen jarraitzeko".
Mendi martxaz
Berrogeita hamar bat pertsonak Altsasutik San Pedro zelairantz abiatu ziren Guardia Civilaren patruila baten begiradapean. Ermitaren inguruan azaldu zutenez, "azken aldian berpiztu duten 3. alternatibak hemen eragingo luke kaltea, baita bertatik pasarazi nahiko luketen goi tentsioko lineak ere". Handik Altsasura bueltatu eta, gosaldu ondoren, 80 bat pertsonak udaletxe parean kontzentrazioa egin zuten, AHTko zundaketak gelditzeko aldarrikatzeko. Deitzaileek gaineratu zutenez, bilkura ere, "Altsasuko Udalaren jarrera" salatzeko egin zuten, "Sakanan AHTa sustatzen duen udal bakarra baita, nahiz eta Altsasurako kalteak ekarriko dituela jakitun, tren geltokirik gabe gelditzea besteak beste". Elkarretaratzea baliatu zuten "ingurumenean kaltea areagotuko" luketen beste zenbait egitasmoren berri emateko, tartean Cementos Portland Valderrivas enpresaren bi: harrobia handitzea eta hondakinak errausteko duen plana.
Altsasuko geldialdiaren ondoren, oinezkoak Olatzagutirako bidea hartu zuten. Ibilbidean zehar bi herrietan dauden zundaketa puntu posible bana non leudeken ezagutu zuten. Olatzagutiko plazan despeditu zen martxa, eta mahaiaren bueltan berreskuratu zituzten indarrak oinezkoek.