Txirrindularitza

Iker Gomez, bosgarrena Gorlako Igoeran

Guaixe 2025ko api. 1a, 11:30

Finisherrekoak, lanean. FINISHER

Bere taldekide Unai Ramos hirugarren sailkatu zen eta pozik daude Finisher taldean. Gainontzeko sakandarrak ere txukun ibili ziren

Afizionatuen mailako tropelak Euskaldun Txapelketan hitzordu bikoitza izan zuen asteburuan. Martxoaren 29an Markina-Xemeinen XXXIV. SF Haitzasko Oroimenezkoa jokatu zen, 117 km eta bost portu zituen lasterketa. Emilio Reinoso (Victory Endurance-Spiuk) gailendu zen (9:19:42), Jorge Gonzalezi (Euskadi Fundazioa) eta Pablo Lospitaori (Rural Kutxa-Alea) segundo bat aterata. 

Martxoaren 30ean, igandean L. Gorlako Igoera proba ezaguna jokatu zen Bergaran (114,3 km). Lasterketa oso lehiatua izan zen hasieratik, eraso eta ihesaldiekin. Horietako batek 5 minutuko aldea hartu zuen, baina tropela lanean hasi zen, Finisher taldeak bultzatuta, eta tartea murriztu zuten. 
Azkenean, Jesse Maris (Essax-Svico Foundation) iritsi zen bakar-bakarrik helmugara (2:57:35). 7 segundo atera zizkien Pedri Crause-ri (Natural Greatness) eta Unai Ramosi (Finisher); 11 segundo Alejandro Granadosi (Vigo-Rias Baixas); eta 8 segundo bosgarren sailkatu zen Iker Gomez altsasuarrari (Finisher). Lan bikaina egin zuen Gomezek. 

Mikel Uncilla etxarriarra (Rural Kutxa-Alea) 28. sailkatu zen (2:59:40), eta Aimar Tadeo (Euskadi Fundazioa) 52. (3:02:11). Iker Agudelo (Barranka T.T.) 133. sailkatu zen (3:11:54). 

Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!