Nafarroako Futbol Federazioak 2025/2026 denboraldirako futbol eta areto futboleko selekzioen organigrama teknikoa aurkeztu du. Guztira hamaika selekzio izango ditu Nafarroak. Lehendabizikoz, emakumezkoen futbol selekzioek emakumezko entrenatzaileak izango dituzte.
Leandro, Asier eta Maider
Selekzioak gidatuko dituzten teknikarien artean sakandarrak daude. Leandro Fernandezek areto futboleko emakumezkoen 16 urteko entrenatzaile jarraituko du. Bere garaian Xotako jokalari fina zenak esperientzia handia du entrenatzaile gisa, talde asko entrenatu baititu.
Bestalde, Osasuna Magna Xotako egungo atezaina den Asier Llamas irurtzundarrak bigarren denboraldia egingo du areto futboleko Nafarroako selekzio guztietako atezainen entrenatzaile.
Azkenik, futbolean, Altsasuko eta Mulierreko entrenatzaile izandako Maider Granizo altsasuarra emakumezkoen 12 urtez azpiko eta 14 urtez azpiko futbol selekzioetako atezainen entrenatzailea izango da.
