Binakako bosgarren jardunaldia ez da batere ona izan gure pilotariendako. Abenduaren 19an Larrazabalek eta Mariezkurrena II.ak 16-22 irabazi zieten Zabalari eta Martijari Zallan jokatutako partida borrokatuan. Abenduaren 20an Altuna-Ezkurdia eta Artola-Imaz parez-pare aritu ziren Donostiako Atano III.ean, bukaerara arte berdintasuna izan zen nagusi, baina azken txanpan Artolak eta Imazek 16-22 gailentzea lortu zuten. Azkenik, abenduaren 21ean Gernikan jokatutako partidan Laso eta Albisu erraz gailendu ziren Elordiren eta Zabaletaren aurrean. Bosgarren jardunaldiko azken partida abenduaren 22an jokatuko dute Jaka-Iztuetak eta P.Etxeberria-Rezustak Arrasaten.
Hurrena
Sailkapenean Laso-Albisu daude buruan, 4 punturekin. Elordi-Zabaletak, Larrazabal-Mariezkurrenak eta Artola-Imazek hiruna puntu dituzte, Altuna-Ezkurdiak, Zabala-Martijak eta Jaka-Iztuetan bina puntu dituzte eta Etxeberria-Rezustak ez dute punturik.
Seigarren jardunaldiari dagokionez, abenduaren 25ean Elordi-Zabaletak Artola-Imaz izango dituzte aurkari Astelenan; P.Etxeberria-Rezustak Larrazabal-Mariezkurrenaren kontra jokatuko dute abenduaren 26an Barañaingo Retegin; Zabala-Martijak Jaka-Iztueta dituzte arerio abenduaren 27an Adarragan, eta Altuna-Ezkurdia Laso-Albisuren kontra lehiatuko dira abenduaren 28an Ogetan.
Altsasuk partida bat hartuko du
EPEL-ek bigarren itzuliko egoitzen berri eman du. Binakako hasierako ligaxkako hamalaugarren eta azken jardunaldiko partida bat Altsasun jokatuko da.