Kontzejuek populazioari eutsi diote

Ibarrak 2024 urtearekin alderatuta hamabost biztanle galdu zituen, eta Sakanako populazioa 20.670 pertsonakoa zen 2025eko ilbeltzaren 1ean. Biztanleria galera horretatik bi pertsona bakarrik ziren kontzejuetan bizi zirenak. Sakanako kontzejuetan ibarreko populazioaren %6,86 bizi da, 1.417 sakandar. Portzentajea 2024. urteko bera da. Kontzejuek 2021z geroztik 52 biztanle irabazi dituzte. 

Sakanan kontzejuz osatutako hiru udalerriak Arakil, Ergoiena eta Etxarri Aranatz dira. Guztira 16 herri dira (Aizkorbe barne sartu dugu, nahiz eta administrazio egiturarik ez duen). Kontzejuetako populazioaren %69,87 Arakilen bizi da (0,6 puntuko jaitsiera), %27,52 Ergoienan (2,47ko jaitsiera) eta %2,61 Lizarragabengoan (0,07ko igoera). Ergoienak zazpi biztanle gehiago zituen, Lizarragabengoak bat eta Arakilek hamar gutxiago.

Bederatzi kontzejuetan populazioak gora egin zuen aurreko urtearekin alderatuta: Urritzola (3), Errotz (3), Egiarreta (3), Unanu (3), Lizarraga (3), Etxeberri (2), Zuhatzu (1), Dorrao (1) eta Lizarragabengoa (1). Guztira 20 biztanle irabazi zuten bederatzi herri horiek. Gainontzeko zazpi kontzejuetan biztanleriak 22 pertsonetan behera egin zuen: Izurdiaga (6), Ihabar (4), Aizkorbe (3), Satrustegi (3), Hiriberri Arakil (3), Ekai (2) eta Etxarren (1).

Kontzejuen 2025eko hasierako populazioa 1999koarekin konparatuz gero, Arakilgo biztanleria %12,63 hazi da, eta 111 herritar gehiago ditu. 26 urte horietan Ergoienak, berriz, populazioaren %18,92 galdu du, 91 biztanle gutxiago ditu. Lizarragabengoari dagokionez, aldi horretan biztanle kopuruak %15,63 egin du gora, bost herritar irabazita.