Mutilen erregional mailako bosgarren multzoan 24. jardunaldia jokatu zen. Etxarri Aranatzek Lagunak B taldea hartu zuen San Donato zelaian. Etxarri hasi zen agintzen. Jon Erdozia, Xabier Igoa eta Mattin Altzelairen hat-trickari esker 5-1 jarri zen aurretik Etxarri Aranatz, baina Lagunak ez zuen etsi eta partida bukaeran 5-4 gerturatu zen. Azkenean 3 puntuak etxean geratu ziren, liderraren pozerako.
Lagun Arteak Baztan B izan zuen aurkari Elizondon. Gauzak ederki hasi ziren lakuntzarrendako, Mikel Agirrek eta Asier Artasok 0-2 aurreratu baitzuten Lagun. Atsedenaldia baino lehen 1-2 gerturatu zitzaien Baztan, baina bigarren zatia hasi eta berehala Ander Cocerak Lagunen hirugarrena sartu zuen, 1-3. Tamalez, Baztanek ez zuen etsi, eta, gutxika, markagailua irauli zuen: hiruna berdindu eta gero, azken minutuetan beste bi gol sartzeko aukera izan zuten eta Baztan B taldearen kontra 5-3 galdu eta gero, Baztandik esku hutsik itzuli ziren lakuntzarrak, igoera fasera gerturatzeko 3 puntu oso baliotsu alferrik galduz.
Etxarri Aranatzek jarraitzen du lider (60 puntu), Kirol Sporten aurretik (52 puntu). Lagun Artea laugarren da (38 puntu), igoera postuetatik 9 puntura. 25. jardunaldian Etxarri Aranatzek sailkapenean hirugarren den Universidad de Navarra hartuko du San Donato zelaian, eta Lagun Arteari atseden jardunaldia dagokio.