Monoplazen mailan Garikoitz Flores (Talex M3) izan zen txapelduna, bederatzigarren klasean lehena, eta scratchean edo sailkapen orokorrean denborarik onena egin zuena (2:37.566). Turismoetan Mikel Mazkiaranen Seat 600 JTR ezin hobe aritu zen, eta turismoetan lehena izateaz gain, lehen klasean lehena izan zen, eta scratchean bigarren, segundo batera (2:38.441). Alberto Villarrek (BMW M3 E36) lan ikusgarria egin zuen eta turismoetan bigarren, hirugarren klasean lehena eta scratchean hirugarren izan zen (2:41.881).
Gainontzeko sakandarrei dagokienez, Miguel Anton (BMW 3251) turismoetan laugarren sailkatu zen (2:47.095), eta Asier Solis (BMW E36 M57) hamaseigarren (3:19.338). Gainera, eta eskuderia gisa garrantzitsuena, Sakana Motorsport eskuderiak Open Series Fenauto Txapelketako lehen postua lortu zuen.
Urriaren 3an jokatuko den Urbasako Igoerarako prestakuntza ezin hobea egin zuten pilotu sakandarrek.