Lau eta Erdiko Txapelketako final laurdenetako ligaxka pil-pilean dago. Asteburuan jokatutako lehen jardunaldian, A multzoan Joseba Ezkurdiak Peio Etxeberria izan zuen aurkari Amorebieta-Etxanon. Bi espezialista handien talka izan zen, Ezkurdiak hiru txapel baititu eta Peio Etxeberria egungo txapelduna baita, txapel batekin.
Bi pilotariek lehia oso borrokatua izan zuten. Hasieran Etxeberriak dominatu zuen eta 10-3 jarri zen aurretik. Ezkurdiak, baina, partidari buelta eman zion eta 15-4ko partzialari esker 18-14 jarri zen aurretik, ikusgarri aritu eta gero. Ezkurdiak partida bideratua zuela zirudienean, ordea, egungo txapeldunaren erantzuna iritsi zen eta zortzi tanto sendo egin eta gero, markagailua irauli eta 22-19 gailendu zen. Bere urtebetetze egunean opari ordainezina jaso zuen Peio Etxeberriak, final laurdenetako puntuak garesti baitaude. Ezkurdia penatuta zegoen azken txanpa horretan egindako akatsengatik, baina tantoaverage-a kontuan hartuta, 19 tanto egin zituen eta horrekin konformatu beharko du.
A multzoko beste partidan Elordiri 19-22 irabazi zion Muruak. B multzoan, Peña II.ak 11-22 hartu zuen mendean Laso eta Altuna 15-22 erori zen Zabalaren kontra.
B Seriean, Bakaikoaren lehen puntua
B Serieko Lau eta Erdiko Txapelketan, final laurdenetako ligaxkako lehen jardunaldian puntu gozoa lortu du Joanes Bakaikoak, Gasteizko Ogeta pilotalekuan Eskiroz 22-12 mendean hartuta. Aurrelari etxarriarrak hiru txapela ditu, eta faboritoen artean dagoela erakutsi zuen, partida gogorrean lehen zatian abantaila hartuta. 48 minutu iraun zuen partidan bi pilotariek 285 pilotakada gurutzatu zituzten.