Binakako Erremonte Profesionaleko Txapelketa-Reyno Gourmet Sari Nagusian Altsasuko ferietan lehen finalerdiak egon ziren jokoan. Promozio mailan Ezkurra III.a-Leatxe sailkatu ziren finalerako, Mikelarenari eta Ilarregiri 35-26 irabazita. Lehen mailako finalerdia bukaerara arte emozio handikoa izan zen eta, azkenean Zeberio II-Otano gailendu ziren, Otxandorenari eta Ioni 35-34 irabazita.
Altsasuko ferietako erremonte jaialdiari lekua hartuko dio Etxarri Aranatzek, urriaren 24an Binakako Erremonte Profesionaleko Txapelketa-Reyno Gourmet Sari Nagusiko itzuliko finalerdiak, bigarrenak, egongo baitira jokoan. Txapelketa Euskal Jai Remontek eta e-remonte Beti Euskal Jaik antolatu dute, eta jaialdia 18:00etan hasiko da Euskalerriari pilotalekuan. Jasotako guztia Josefina Arregi Klinikara bideratuko da.
Lehenik eta behin promozioko itzuliko finalerdia egongo da jokoan. Oses-Agirrezabalak Sagaseta-Baztan izango dituzte aurkari. Bigarren partidan lehen mailako itzuliko finalerdia erabakiko da. Uterga-Barricartek Martxin III-Mitxeo dituzte arerio.