Hauteskunde orokorrak 2026

Senado de progreso hautagaitzak demokrazia, zerbitzu publikoak eta Nafarroako autogobernua indartu nahi ditu

Guaixe

Senado de progresoko hautagaiak adierazpenak egiten. UTZITAKOA

Horrekin batera, askatasunak, eskubide sozialetan aurrera egitea eta Nafarroako zerbitzu publikoak eta autogobernua indartzea defendatu du.

Senaturako hautagaitza osatu dute PSNk eta Fronte Zabalak: Senado de progreso. Hautagaitzan Angel Moleon (PSN), Ane Sanchez (Frente Amplio) eta Jesus Maria Rodriguez (PSN). Moleonek nabarmendu duenez, "Nafarroan, autogobernuarekin, osasuna, hezkuntza, gizarte zerbitzuak edo zergak bezalako gaietan erabakitzeko dugun gaitasuna; gure foruez, Hitzarmen Ekonomikoaz eta gure Konstituzioak jasotzen dituen eskubide historikoez ari gara".

Esan duenez, "hau guztia, azaroaren 29tik aurrera, mehatxupean dago. Nafarroako eskuinak eta ultraeskuinak, UPNk, PPk eta Voxek eskumenak iraultzeaz eta zentralizatzeaz hitz egiten ari dira, gure Hitzarmen Ekonomikoa edo foruak ezabatzeaz". Horren aurrean, "Senado de progreso koalizioak argi dauka zein Espainia nahi dugun, ikuspegi federala duen Espainia plurala, Nafarroaren berezitasuna errespetatu eta aitortuko duena, espainiarren arteko eskubide berdintasuna bateragarria delako lurraldeen berezitasunarekin", azaldu du.

Bestalde, Ane Sanchezek Senatuan gehiengo "aurrerakoia" izatearen alde egin du, "eskuina eta ultraeskuina Ganbera horretan ere gelditzeko". Sanchezek esan duenez, "helburuak argiak dira: demokrazia eta emakumeen eskubideak blindatzea, atzera egin ez dezagun; etxebizitzarekiko espekulazioa geldiaraztea eta herritar guztientzako etxebizitza duina bermatzea; eta zerbitzu publikoak defendatzea, horiek baitira herritar guztiok aukera berdinak izatea bermatzen duten bakarrak", adierazi du. "Nafarroaren ahotsa Senatura eramatea" ere defendatu du Sanchezek, "Nafarroako eta Estatu osoko bizitza hobetzeko gaudelako".

Jesus Maria Rodriguezek adierazi duenez, "konfrontazioaren aldeko apustua egiten duten eskuindarren aurrean, demokrazia elkarrizketaren, bizikidetzaren, aniztasunaren eta erakundeen errespetuaren bidez indartuko duen eredu baten aldeko apustua egiten dugu". Gaineratu duenez, "eskuindarrek gehiengo zabala izan nahi dute Senatuan, botere judiziala kontrolatzen saiatzeko, Konstituzioa aldatzen saiatzeko, aldarrikatuta zeudela uste genuen eskubideak eta askatasunak murriztuz, baina argi dago Senatuan gehiengo garrantzitsua lortu behar dugula eskuindarren ideia horiek iraultzeko", esan du.

Bi hautagaiek defendatu dute Senatua izatea "lurralde guztiak presente dauden lurralde-ganbera, konfrontazio ganbera bat ez izatea, politika lokaztu nahi duen kontraboterekoa, azken legegintzaldian eskuindarrek horretan aritu baitira".