Bere balio handiagatik, munduan halako lau kutxa besterik ez dira ezagutzen. Nafarroako Gobernuak Aralarko santutegiko bolizko kutxa (XI.-XII. mendea) Kultur Intereseko Ondare izendatu du. Bolizko bloke batean egindako kutxa bat da, lauki luzea, tapa irristailua duena. Ertzetan grabatutako dekorazioa du eta tapan arabiar karaktereekin idatzitako testuak ditu. Kutxa islamiar horren jatorria ezezaguna da. Ekialdean, Egipton, kokatzen dute batzuk bere jatorria, baina ez dute baztertzen hispaniar musulmanena izatea. Trukean aritzen ziren pertsonek edo bankariek erabiltzeko pentsatuta dago. Erdiko zatia borobila da eta balantza baten platertxoak gordetzeko aproposa da; zati luzean, berriz, balantzaren ardatza gordeko litzateke eta, gainontzeko espazioetan, pisu-jokoa eta bestelako tresnak gordeko lirateke. Gerora, santutegian zegoen Lignum Crucis-eko (Jesus gurutziltzatu zuten gurutzea) zati bat gordetzeko erabilia izan zen. Kapera nagusiko sagrarioan izaten zuten. Kutxa islamiarrak 11, 7 x 23,5 x 11 cm tamaina du. Ongi kontserbatuta dago. Haustura batengatik ertzetan urre-koloreko kobrezko plakak ditu.