Aurtengo ihote ospakizuna gosalduz hasiko dute uhartearrek. Izena eman duten animosoenek Marisolerenean hamarretakoa janen dute. Haiek mahaiaren bueltan segitzen duten bitartean, 11:30ean, haurrendako gozo-eltzeak izanen dira. Begiak estalita makilarekin haiek hausten asmatu beharko dute. Eguerdian kalejira eginen dute fanfarreak, joaldunek eta Euskal Kantak. Azken horiekin bazkal aurretik ez da kantu saiorik faltako. 15:00etan eseriko dira mahaira, alondegian. Ihote-bazkaria dastatu ondoren, 18:00etan, kalejiran herriari buelta ematera abiatuko dira. Hura bukatuta auzatea izanen da, inauterietako sua piztuko dute eta han panpina erreko dute. Herrixka galduen dantzaren ondoren parranda ordu txikietaraino luzatuko da.