Foruzaingoak 42 urteko gizonezko beasaindar bat atxilotu zuten Altsasun asteartean, irailak 8, 14:00etan. Herritar batek lapurreten ustezko egilea Altsasun ikusi zuen eta Foruzaingoari jakinarazi zion. Altsasuko polizia etxeko Prebentzio eta Herritarren Arretarako Taldeko agenteek gizonezkoa lokalizatu eta atxilotu egin zuten.
Atxilotutakoari Uharte Arakilgo Sargaitz industrialdeko enpresa batean lapurreta egitea eta etxebizitzen barruan indarra erabiliz beste bi lapurreta egitea egotzi diote. Baita Orikaingo etxebizitzetan indarra erabiliz lapurtzea ere egotzi diote. Bi kasuetan, gizona eraikinetara sartu zen, eta jabeek ustekabean harrapatu zuten. Jabeek alerta jo zuten, eta egilearen deskribapen zehatza eman zuten salaketak jartzean, eta horrek identifikazio osoa erraztu du.
Horretaz aparte, ustezko egileak mugitzeko erabilitako ibilgailua ibilgetuta geratu zen kalte tekniko larrien ondorioz. Gainera, agenteek egiaztatu zuten Ibilgailuen Azterketa Teknikoa (IAT) aspaldi iraungita zegoela, eta, beraz, zegokion salaketa administratiboa izapidetu zen.
Foruzaingoak nabarmendu eta esplizituki eskertu du herritarrek izan duten inplikazioa: "Beste behin ere, lankidetza aktiboa, abisua emateko azkartasuna eta lekukoek emandako datuen zehaztasuna funtsezkoak izan dira gertakariak argitzeko eta delitugile berrerorle hori berehala atxilotzeko". Foru poliziak gaztigatu duenez, "Segurtasuna guztion konpromisoa da". Eta herritarrei gogorarazi dienez, "oso garrantzitsua da edozein jokabide susmagarri edo larrialdi egoera berehala jakinaraztea. Horretarako, Foruzaingoaren zuzeneko telefonoa (948 20 29 20) eta larrialdietako telefonoa (112) martxan daude eguneko 24 orduetan".