Flirte-art gala erotikoa eszenara eramanen dutenak Haize Berriak bandak, Zirkus blai zirku gazte taldea eta Zirika Zirkus dira. Artisten, musika-tresnen eta publikoaren artean flirteoa piztu eta gozatzeko moduko saioa eskaintzeko asmoa dute. Galan hiru taldeen arteko kideek elkarri-eraginen diote. Batzuek musikarekin edo musika tresnekin, malabarismoekin eta akrobaziekin besteek, azkenek, umorez.
Haize Berriak bandako Iosu Rubiok eta Moti Altzelaik jakinarazi zutenez, hainbat musika estiloko sei doinu joko dituzte galan: Dimitri Shostacovichen bals bat; Arturo Marquez Navarroren Danzon nº 2; Joe Cockerren You can leave your hat on; AEB hegoaldeko dixie doinu bat; tango bat eta Pedro Beltran Ruizen eta Luis Demetrioren Quién sera.
Emanaldiaren aurkezpenean Gozamenez programako arduradunek azaldu zutenez, “gala mimoz, ilusioz eta esfortzu handiz prestatu dute taldeek”. Programako arduradunek jakinarazi zutenez, 10. urteurrenerako bandarekin harremanetan jarri ziren, “baina hutsean gelditu zen. Maiteminduta jarraitu dugu azken urte hauetan, eta aurreneko topaketa horren ondorioz, eta edabe erotiko batzuei esker, astelehenean guztiok gozatu eta laztankerietan ibiliko gara”.
Gozamenez, 2016ko udazkena | |||
Herria | Data | Ordua | Zer |
Altsasu | Lastailak 31, astelehena | 20:30ean | Flirte-art gala erotikoa |
Altsasu | Azaroak 11, ostirala | 22:00etan | Zine-foruma. Una noche de verano. |
Altsasu | Azaroak 19, larunbata | 18:00etan | Sentipen ibilbidea. Neska gara, eta zer? |
Ergoiena | Zehazteko | Tailerra |