Euskaraldia

guaixe.eus

Garrantzitsuena 12. eguna da

  Gizartea  Altsasu

Euskararen Egunean despeditzen dugu Euskaraldia. Altsasun Bukaera edo hasiera ekitaldia egin da Altsasun eguerdian. Ekitaldian Haize Berriak bandako kideak, Altsasuko gaitariak, trikitilariek eta Irantzu Gonzalez dantza eskolako dantzariek parte hartu dute. Maddalen Arzallusezk gaurko propio idatzitako testua irakurri dute herriko Euskaraldiko kideek.

Hamaika egun, hamaika gogoeta


1. Ahobizi eta Belarriprestok elkarren beharra izan dugu ahalduntze kolektiborako ariketa hau aurrera atera ahal izateko. Elkarrekin saiatu gara gure eguneroko inertzia linguistikoak astintzen, eta modu kontzientean egin dugu gainera. Euskaraz gehiago hitz egiteaz gain, gure hizkuntza-erabilerari buruz hausnartu eta eztabaidatu dugu.


2. Inon idatzita jasotzen ez den arau soziala aldatzen aritu gara: nahikoa da gure ondokoak euskaraz ulertzea gu hari euskaraz zuzentzeko.


3. Talde handi batean euskaldunak eta erdal hiztunak nahasian daudenean, euskaraz egitea ez da inor bazterrean uztea, alderantziz: euskaraz hitz eginda gure kulturaren eta hizkuntzaren ateak zabaltzen dizkiegu; eta, bestela, itxi.


4. Euskaraldian ez dugu ahobizi eta belarriprestok bakarrik parte hartu. Baina ez dezagun ahaztu ahobizi eta belarriprest izan ez direnak gehiengoa direla. Hala ere, txapadunen kopuruak pixkanaka-pixkanaka gora egin duenez gero, pentsa dezagun geroz eta gehiagok zabalduko dituztela bost zentzumenak.


5. Gure herriko dendaria euskalduna da. Euskaraldia hasi arte, egunero-egunero erdaraz egiten nituen erosketak, erdalduna zelakoan. Baina horrek bezainbesteko mina eman dit hark ere nitaz gauza bera pentsatzen zuela ohartzeak.


6. Botere-harremanek lotura zuzena dute gure hizkuntza-erabileran. Hamaika egunotan nire lankideak euskaraz agurtzen saiatu arren, ez naiz ausartu nagusia bere konfort egoera linguistikotik ateratzen. Euskarak goitik behera eta behetik gora balio ez duen artean, ez die beste hizkuntzei aurpegiz aurpegi begiratuko.


7. Bakoitzak norbere hizkuntzan bizitzeko eskubidea duen heinean, euskaldunak euskaraz bizitzea ez da gutizia hutsa, ez eta desioa ere. Euskaldunak euskaraz bizitzea euskaldunen eskubidea da. Noiz jarriko da benetan praktikan eskubide sinboliko hori?


8. Euskaldun denok erdaraz ere badakigun modu berberean jakin beharko lukete erdaldun denek euskaraz ere. Pentsa zer desberdina litzatekeen gure lurra herritar guztiak elebidun bizi izango bagina...


9. Beste behin ere, herritarrek saretzen jakin dugu. Herritik sortutako ekimen batek batu gaitu, eta herritarrek eta erakundeek elkartuta ditugun indarra eta potentzialtasuna agerian geratu dira. Klika egin dugu.


10. Euskaraldian herritarrok emandako urratsek babes-neurriak behar dituzte eta, gainera, entitate publiko zein pribatuei dagokie neurri horiek hartzea. Instituzioen erantzukizuna da epe luze eta laburrean euskararen jakintza orokorra bermatzea; baina, horretarako, lehentasuna eman beharko zaie hizkuntza-politikei.


11. Elkarlanean egon da Euskaraldiaren lorpenen sekretua. Goi-kargudun, Herri-plataforma, kooperatiba handi zein enpresa txiki eta boluntario gisa ahal guztiz lan egin duten norbanako bakoitzari zor zaio bere ahalegina. Ikas dezagun, etorkizun baterako ere, aurrera egingo badugu, guztion beharra izango dugula.


Post Data:
12. Arnas luzeko bidea da hau eta bakoitzaren abiapuntutik aurrerapausoak  ematen eta inertziak astintzen jarraitzea da helburua. Ez ahaztu Euskaraldiko egunik garrantzitsuena Hamabigarrena dela.

Maddalen Arzallus Antia

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa

Laguntzaileak