Fiskaltza altsasuarren helegiteen kontra, zigorrak berrestearen alde

Guaixe 2019ko eka. 4a, 15:23
Espainiako Auzitegi Nazionalean egindako bigarren epaiketako saio bat.

Altsasuko auzian Espainiako Auzitegi Gorenari eskatu dio zortzi akusatuen defentsak aurkeztutako helegiteak atzera botatzea eta zigorrak berresteko eskatu du.

Espainiako Auzitegi Nazionalean birritan atzera bota dute Altsasuko auzian terrorismo deliturik izan denik. Zortzi altsasuarren defentsek aurkeztutako kasazio helegiteak tarteko, auzia Espainiako Auzitegi Gorenera iritsi da. Defentsek zortzi altsasuarren absoluzioa eskatu dute. Jakina zen fiskaltzak ez zuela terrorismo eskaerarik eginen. Baina atzo jakin zenez, altsasuarren defentsak aurkeztutako helegiteen kontra dago. Eta Goreneko epaileei eskatu die altsasuarrei ezarritako zigorrak baieztatzeko. Fiskaltzak bere idatzian ere helegitea lehentasunez tramitatu dadila eskatu du, auzipetutako zortzi altsasuarretatik zazpi behin behinean preso baitaude.

Fiskaltzak bere idatzian ukatu egiten du Altsasuko auziko bi epaiketetan izan diren epaileak partzialak izan direnik. Jakina denez, defentsek salatu izan dute Guardia Civilaren dominak jaso izan dituztela hiru epailek eta beste bat Guardia Civil baten koronel batekin ezkonduta dagoela. Horrek “inpartzialtasunaz susmatzeko arrazoirik ez duela ematen” gaztigatu du fiskalak.

Altsasuko auziko zigorrak
Auzipetua Apelazio epaiko zigorra eta egoera
Oihan 13 urte
  3 urte: agintearen agenteen kontrako delituagatik.
  9 urte: hiru lesio delituengatik.
  Urte 1: desordena publikoak.
  Egoera: 845 egun behin-behinean preso.
   
Adur 12 urte
  3 urte: agintearen agenteen kontrako delituagatik.
  9 urte: hiru lesio delituengatik.
  Egoera: 845 egun behin-behinean preso.
   
Jokin 12 urte
  3 urte: agintearen agenteen kontrako delituagatik.
  9 urte: hiru lesio delituengatik.
  Egoera: 845 egun preso.
   
Jon Ander 9 urte
  3 urte: agintearen agenteen kontrako delituagatik.
  6 urte: hiru lesio delituengatik.
  Egoera: 266 egun behin-behinean preso (+37 2016an).
   
Julen 9 urte
  3 urte: agintearen agenteen kontrako delituagatik.
  6 urte: hiru lesio delituengatik.
  Egoera: 266 egun behin-behinean preso (+37 2016an).
   
Aratz 9 urte
  3 urte: agintearen agenteen kontrako delituagatik.
  6 urte: hiru lesio delituengatik.
  Egoera: 266 egun behin-behinean preso (+37 2016an).
   
Iñaki 6 urte
  3 urte: agintearen agenteen kontrako delituagatik.
  2 urte: lesio delituagatik.
  Urte 1: desordena publikoak.
  Egoera: 266 egun preso (+37 2016an).
   
Ainara 2 urte
  Urte 1: mehatxu delitua.
  Urte 1: desordena publikoak.
  Egoera: baldintzapean aske.