Altsasuko elikagai eta artisautza azoka, eta gehiago

Pandemiagatik Altsasuko Udalak aurten ez du ferietarako egitaraurik prestatu. Hala ere, elikagaien eta artisautzaren azoka antolatu du larunbat goiz eguerdirako. Udalak azaldu duenez, “azoka horren helburua da kalitate goreneko prestatutako hurbileko produktuak kontsumitzaileari hurbiltzea”. Guztira 16 ekoizle eta 13 artisau izanen dira larunbatean Altsasun. “Azokan elikagai bikainak aurkituko dituzu, esate baterako: gazta, eztia, ahatekiak, txerrikiak, euskal pastela, ogia eta beste, horietako batzuk ekologikoak. Artisautzari dagokionez, azokatik pasatzen denak zilarrezko bitxigintza, zurezko jostailuak, poltsak, arropa apetatsuak, xaboidun artilezko hodeiak eta abar opatuko ditu. “Udal honek berriro ere gure nekazaritzaren eta eskulangintzaren aldeko apustua egiten du, altsasuarrek eta bisitatzen gaituzten pertsonek lehen mailako produktuak eskuragai izan ditzaten, horrela, gure nekazari eta eskulangileei ere laguntzeko”, azpimarratu du Altsasuko Udalak.

Azokaz aparte, asteburuan ekitaldi gehiago izanen dira. Puro Relajo taldeak gaur kontzertua eskainiko du Iortia kultur gunean. Bi emanaldi izanen dira. Ohi bezala, Artekalek arte azoka prestatu du. Asteazkenean zabaldu zituen ateak Iortia kultur gunean, eta azaroaren 4ra arte ikusgai izanen da. Gainera, domekan, 10:30etik 14:00etara arte, azoka kalean izanen da. Larunbat goizean, bestalde, Onddo lasterketa jokatuko da. Hainbat altsasuarrek prestatutako egitaraua ere badago. Domekan ere kalera bueltatuko dena Altsasuko Erraldoien konpartsa izanen da. 11:30ean Intxostiapuntako gimnasiotik abiatuko dira. Herriko kaleetatik barna ibili ondoren, 14:00etan, Foru plazara iritsiko dira erraldoiak. Altsasuko Mendigoizaleak elkarteak 35. argazki rallya antolatu du domeka goizerako. Udalaren asteburuko eskaintza borobiltzeko Iortia kultur guneak Paul Verhoevenen Benedetta filmaren emanaldia hartuko du, domekan, 19:30ean.