Altsasu Kirol Elkarteak abenduaren 3an aurkeztu zituen 2025/2026 denboraldiko taldeak, ligen geldialdia aprobetxatuz. Aurten hemezortzi talde dira guztira, hamasei futbol talde eta bi areto futbol talde. Guztira 310 jokalari inguru dira, eta entrenatzaile eta teknikariak, 30 inguru. Guztia koordinatzen, buru-belarri, Altsasu Kirol Elkarteko hiru futbol koordinatzaileak: Aaron Ramos, Jenni Ubeda eta Goyo Rodriguez.
Hemezortzi taldeak
Hamasei futbol taldeetatik hamahiru gizonezkoenak dira: aurrebenjaminak (Iñaki Cristobal entrenatzailea), benjaminak A (Iñaki Cristobal), benjaminak B (Aitzol Hernaiz eta Julen Arregi), kimuak A (Asier Somocurcio eta Mikel Rodriguez), kimuak B (El Mahdi Mabchour eta Jose Exposito), kimuak C (Eneko Galan eta Mikel Zufiaurre), bigarren infantila (Aaron Ramos eta Aritz Zabala), lehen infantila (Bruno Miguel Maia eta Silviu Socea), bigarren kadetea (Luis Alberto eta Luis Byron Medina), lehen kadetea (Julian Sevilla eta Eneko Guajardo), bigarren jubenila (Alejandro eta Fernando Alberto Morais), lehen jubenila (Peio Goikoetxea) eta preferente taldea (Ivan Claver). Nesketan hiru talde dira: infantilak (Raul Agirre eta Cristian Davila entrenatzaileak), jubenil-kadetea (Nerea Arellano eta Elene Andueza) eta hirugarren maila (Gorka Chamorro, Adrian Claver eta Ekai Urkijo).
Haiei areto futboleko bi taldeak gehitu behar zaizkie: hirugarren mailako taldea (Miguel Barrero eta Goyo Rodriguez), eta aurten sortutako talde berria, lehen maila autonomikoa (Goyo Rodriguez eta Iselmu Buzeid).
Altsasu Kirol Elkarteko junta
Hemezortzi taldeak eta Dantzaleku kudeatzea ez da lan makala. Joan zen urteko juntan ez da aldaketa aipagarririk egon. Jesus Sayasek jarraitzen du lehendakari, Iñaki Cristobalek lehendakariorde, Jenni Ubedak diruzain, Leire Gonzalezek lehen idazkari, Laura Crespok bigarren idazkari eta Aaron Ramosek, Goyo Rodriguezek eta Elisabeth Fresnedak bokal. Juntara jende gehiago batzeko deia egin dute. "Ateak zabal-zabalik ditugu" nabarmendu dute hiru futbol koordinatzaileek. Koordinazioan hiru izatearen onurak defendatu dituzte. "Futbol taldeak koordinatzeko hiru kide egotea dugun onenetakoa da, erabakiak hartzerako garaian iritzi ezberdinak ditugulako eta guztiak aintzat hartzen direlako. Alde horretatik, neutralagoa da. Erabakiak hartzerakoan ezberdin pentsatzen duten hiru buru daude, eta hartutako erabakia uniformeagoa da, osoagoa".
Jenni Ubeda: "Dantzalekuko taberna diru iturri garrantzitsua bilakatu da"
Dantzalekuko taberna
Taldeen martxa emateko lanari Dantzalekuko taberna kudeatzeko ardura gehitu zioten iaz. Lau urteko kontratua sinatu zuten Altsasuko Udalarekin, eta Dantzalekuko taberna Altsasu Kirol Elkartearen diru iturri garrantzitsuenetako bat bilakatu da ordutik. "Lan handia da, baina egin beharrekoa, diru iturri garrantzitsua delako. Bestela, itota geundeke" argi du Jenni Ubedak.
Izan ere, klubak aurrera egiteko dituen gastuak handiak dira, "eta jendea ez da kontziente". Esaterako, futbolean jubeniletatik gora jokalari bakoitzaren fitxagatik ordaindu behar da, eta kategoria horretatik behera Nafarroako Futbol Federazioko txapelketetan lehiatzen den talde bakoitzarengatik izena emate kuota ordaintzen da. Arbitroei ordaindu behar zaie, jasotako txartel hori edo gorri bakoitzeko kopuru bat ordaindu behar zaio federazioari, jokalari guztiek pasa beharreko mediku azterketak pagatu behar dira, eta bestelako ohiko gastuak: jokalarien ekipazioak, materiala, entrenatzaileak, Dantzalekuko eta Zelandiko azpiegiturak... Areto futbolean, adibidez, hirugarren mailako jokalari bakoitzak 300 euro ordaindu behar ditu soilik bere mutualitatea ordaintzeko. Horri beste guztia gehitu behar zaio. "Arbitro bat Zelandira datorren bakoitzean 240 ordaindu behar zaizkio, txartel hori bakoitzeko lau euro ordaindu behar dira... eta abar. Jendea ez da kontziente. Babesleak ditugu eta ekimenak antolatzen ditugu, bestela... " nabarmendu du Goyo Rodriguezek.
Horregatik, tabernatik etorritako irabaziak eta martxan jarri dituzten bestelako ekimenekin lortutakoak, udako futbol campusak edo abenduaren 27ko areto futboleko 12 orduak, kasu, zerutik etorritako ogia dira, bazkideen kuota bezala.
380 bazkide inguru
Altsasu Kirol Elkarteak 380 bazkide inguru ditu, urtero 60 euro ordaintzen dutenak. Kimuetatik gorako jokalarien familiek bazkide egin beharra dute, gastuekin laguntzeko. "7.000 biztanletako herri batean 380 bazkide izatea ez da gehiegi, baina jendeari kosta egiten zaio bazkide egitea. Ea kluba sustatzeko gehiago animatzen diren".
Goyo Rodriguez: "Jendea asko inplikatzen da eta hori da gehien eskertzen duguna"
Gurasoen inplikazioa
Nolanahi ere, hiru futbol koordinatzaileek klubaren martxaren balorazio positiboa egiten dute. "Jendea, junta, gurasoak... asko inplikatzen dira eta niri horrek pozten nau gehien. Uste dut lan egiten dugula ikusten dutela, ia egun guztia hemen sartuta gaudela, eta zerbait eskatzen dugunean asko inplikatzen dira. Esaterako, elurra egin zuenean 60 pertsona bildu ziren Dantzaleku garbitzeko, tabernarako boluntarioak eskatzen ditugunean gurasoek laguntzen dute... Eta hori da gehien eskertzen duguna, jendearen inplikazioa, hori klubaren batasunaren erakusle delako. Klubaren batasun horrek bulkatzen nau honekin guztiarekin jarraitzera" ondorioztatu du Rodriguezek.
Hirugarren mailako erronka
Emakumezkoen Altsasu talde nagusiak iaz sekulako denboraldia egin zuen. Emakumezkoen preferente mailako liderra izan zen, partidarik galdu gabe; 17 irabazi eta 3 berdindu zituen. Horrela, mailaz igo eta aurten emakumezkoen hirugarren mailan jokatzen ari da. Iazko egituran oinarrituta, taldea berritu da. Sonia Alonso beteranoak taldea utzi du, eta Laida Garziandia, Ainara Macuso, Eider Vicente, Elene Andueza eta Angela Moreno sartu dira. Gainontzekoak iazko blokekoak dira. Adrian Claver, Gorka Chamorro eta Ekai Urkijo dira entrenatzaileak. "Helburua hirugarren mailari eustea da". Kategoria aldaketa, jakina, nabaritzen da. "Taldeetan asko nabaritzen da, maila bestelakoa da. Hasieran kategoriari tamaina hartzea kostatu zitzaien eta partida dezente galdu zituzten, baina azken aste hauetan nabarmen egin dute gora, hiru garaipen lortu dituzte eta sentsazioak oso onak dira".
Preferentean, gora begira
Gizonezkoen erregional mailan iazko ligako txapelduna izan zen Altsasu, partidarik galdu gabe (31 irabazi eta 3 berdindu), eta igoera fasean Urroztarra mendean hartuta igo zen preferente mailara. Aurten kategoria berriari egokitzen ari da; maila aldaketa agerikoa da. Ivan Claverrek jarraitzen du entrenatzaile eta taldeak iazko egitura du, aldaketa gutxi batzuekin: Angel Vergarak, Imanol Lobok eta Jose Luis Martinek taldea utzi dute eta Unai Irigoien eta Armstrong Fah iritsi dira taldera; gainontzekoak iazko blokekoak dira. "Saltoa nabaritzen da, zalantzarik gabe. Nolanahi ere, guztia kontuan hartuta, Altsasu preferente taldearen helburua mantentzea eta goiko postuei begiratzea da, igoera postuetan sartu eta igoeragatik borrokatzeko". Egun Altsasu bosgarren da, eta azkeneko lau partidetatik bi berdindu eta bi galdu ditu. Bide onean dago, ilusioekin. Ildo honetan, Goyo Rodriguezek beste taldeetan dauden altsasuarrak botatzen ditu faltan. "Nabarmentzen diren jokalariak Iruñeko edo beste probintzietako taldeetara doaz. Horiek guztiak izango bagenitu, lehen maila autonomikora edota hirugarren mailara igotzeko taldea izan genezake. Haiek itzultzea polita litzateke. Eta entrenatzaileekin berdin. Osasuna kluba entrenatzaile altsasuarrez beteta dago".
Preferente taldearekin batera erregional mailako taldea sortzeko ahalegina egin zuen udan Altsasu Kirol Elkarteak, "inor kanpoan jokatu gabe ez geratzeko", baina ahalegina ez zen aurrera atera. "Mundu guztiak preferentean jokatu nahi zuen, baina preferentean ez zegoen denondako tokirik. Bestalde, erregional maila ez da erraza, maila lehiakorra da. Izena ematearekin ez da nahikoa, bertan egotea irabazi beharra dago. Azkenean, ez zen atera".
Areto futbolean, bi talde
Iaz areto futboleko lehen maila autonomikoa irabazi zuen Altsasuk Arbizuren gainetik, soilik bi partida galduta. Gainera, Kopa Altsasuk irabazi zion Arbizuri. Mailaz igo, eta aurten hirugarren mailan lehiatzen ari da Altsasu. "Aldaketa izugarria da, talde oso onak daude. Beste mundu bat da". Altsasu zortzigarren da, eta hiru partida irabazi ditu. "Helburua hirugarren mailan mantentzea da. Barrerok eta biok iazko blokea mantendu dugu. Iñaki Mendozak, Mikel Ruizek eta nik neronek taldea utzi dugu eta Xabier Ormazabal eta Christian Leon etorri dira. Gutxika, ari gara" dio Goyo Rodriguezek. Aurten talde berria sortu dute, lehen maila autonomikoan lehiatzen ari dena. "Talde berria da, osatze bidean dagoena. Lanean ari gara, gustura".
Gainontzeko taldeen helburua futbolean trebatzea eta kirolaz gozatzea da. "Jubenilen A taldea bigarren mailan dago eta helburua lehen mailara igotzea da, eta kadeteen A taldearena kadeteen lehen preferentean mantentzea. Gainontzeko taldeekin ez dago helbururik. Futbol eskola garen heinean, trebatu daitezela, parte hartu eta ongi pasa dezatela. Taldea osatu dezatela, konpromiso hori har dezatela. Emakumezkoen taldeak oso ongi ari dira, oso pozik gaude".
