Nafarroako Probintzia Auzitegiko Lehen Sekzioak bi urteko kartzela-zigorra ezarri dio Altsasuko Osasun Zentroko administrari laguntzaile bati, suhiaren mediku historia behin eta berriz eta arrazoirik gabe erabiltzeagatik. Akusatua Osasunbideko administraria da eta suhiaren baimenik gabe kontsultatu zuen informazio kliniko erreserbatua 2019tik 2024ra bitartean, 171 aldiz, bere lanpostuak ematen zizkion sarbide-gakoez baliatuta.
Epaia 2026ko ekainaren 2an eman zen, eta dagoeneko irmoa da. Haren arabera, egiaztatuta dago funtzionario publiko batek sekretuak agerrarazteko delitu jarraitua egin zuela. Espetxe zigorraz aparte, auzitegiak zazpi urteko erabateko desgaikuntza, 200 metro baino gutxiagora hurbiltzeko edo biktimarekin bost urtez komunikatzeko debekua, eta eragindako kalte moralengatik 15.000 euroko kalte-ordaina ordaintzea ezarri dio.
Hala ere, espetxe zigorraren betearazpena etenda geldituko da baldin eta kondenatuak hurrengo lau urteetan berriro deliturik egiten ez badu, tratamendu psikiatrikoarekin jarraitzen badu eta epaiak ezarritako debeku guztiak zorrotz errespetatzen baditu.
Suhiaren mediku historiarako sarbideengatiko zigorra ezartzerakoan, auzitegiak kontuan hartu zuen ahaidetasunaren astungarria, eta bi aringarri aplikatu zituen: bulkadak kontrolatzeko ahalmenari arinki eragiten zion asaldura psikikoa, eta kaltearen zati bat konpontzea, epaiketa egin aurretik 10.000 euro jaso baitzituen.
Pertsona bera aldez aurretik bere alaba eta hiru iloben mediku historietan baimenik gabe sartzeagatik zortzi urteko espetxeko zigorra jaso zuen.
