Alerta Gorria eta Nafarroa 1512 street-punk taldeek kontzertua eskainiko dute larunbatean, otsailak 19, 23:00etan, Etxarri Aranazko gaztetxean. Emanaldiak espektazio handia sortu zuen eta eskari handia zela eta, Etxarri Aranazko Gazte Asanbladak sarrerak aurretik saltzea erabaki zuen. Ordu erdian sarrerak agortu ziren.
Alerta Gorria eta Nafarroa 1512 taldeek hamar urte baino gehiago daramatzate oholtzaren gainean. Lehenengoak Ametsgaizto bihurtu arte diskoa kaleratu zuen 2019an, hamar urte betetzen zituenean, eta bigarrenak Iraungo du diskoarekin ospatu zuen hamargarren urteurrena 2020an. Street-punk eta Oi estiloetan mugitzen dira biak, eta eszenatokia elkarbanatzera ohituta daude, izan ere, herriko lagunak dira. Musika egitera elkartzen diren bi lagun talde bezala hasi ziren.
