Egunez eta eguraldi onarekin -beroa ere egin zuen- sartu zen Korrika bigarrenez Sakanan. Etxeberriko bidegurutzetik sartu, Irurtzun pasa eta Errotzetik Lizarrarako bidea hartu zuen. Orritzek eta izakiek, Irurtzungo Udalak, Atakondoak, Pikuxarrek eta Aizpeak, Mank-ek eta Guaixek eraman zuten lekukoa.
Guaixe Fundazioaren kilometroa 1793 zen, Korrikak aurten Sakanan egin zuen azkena, eta Guaixek bazkideen esku utzi zuen lekukoa. Rosa Mendoza Arregik irabazi zuen lekukoa eramateko zozketa, eta berak bere alaba Ainhoari eta bere lagun Eukeneri eman zien ohorea.