Urtero moduan Etxeko Indarkeriaren eta Genero indarkeriaren kontrako Behatokiaren sariak banatu dira Espainiako Botere Judizialaren Kontseilu Nagusiaren egoitzan. XIX. edizioan Emma Larreta Alegre lakuntzarrak genero indarkeria desagerrarazteko pertsona nabarmenena aitortzeko saria jaso du. Isabel Perello Auzitegi Goreneko eta Botere Judizialaren Kontseilu Nagusiko presidenteak esan duenez, Larreta "genero indarkeriari fisikoki eta psikologikoki aurre egiteko erakutsitako indar, kemen eta jarrera positiboa" aitortu nahi izan diote sariarekin. Lakuntzarrak Bidean eta InVISIBLES hezkuntza eta sentsibilizazio proiektuak garatu dituela ere azpimarratu dute.
Esanak
Perellok adierazi duenez, genero indarkeriaren aurkako borroka "gizarte osoari" dagokiola, eta Karrera Judizialeko kideek biktimen auziarekin duten konpromisoa aipatu du, "hori baita guztion kausa". Haren esanetan sari banaketa ekitaldiak agerian uzten du "desberdintasunaren islarik txarrena agerian uzten duen fenomeno kriminal bati aurre egiteko borondate kolektiboa".
Sarituak zoriondu ondoren, Perello ziur agertu da indarkeria-mota krudel horren aurka "legediak, itun politikoek, komunikabideek eta, jakina, Justiziak" urteak daramatzatela, baina aurrera egiten jarrai daitekeela "biktima bakar bat gehiago" egon ez dadin, genero indarkeriaren aurkako Estatu Itunak eragindako erakunde guztiek partekatzen duten uste sendoa.
Auzitegi Goreneko eta Botere Judizialaren Kontseilu Nagusiko presidentearentzat, iaz eraildako emakumeen eta salaketen kopuruak "onartezinak" dira, eta agerian uzten dute "indarkeria hori desagerraraztea oraindik egiteke dagoen lana dela, eta horretan jarraitu behar dugula". "Botere Judizialean badakigu gure erantzunak irmoa eta eraginkorra izan behar duela", gaineratu du, "baina, era berean, jakin badakigu gure jardueraren beharrak esan nahi duela emakumeak eta haien seme-alabak osotasun fisiko edo moralean bortxatuak izaten jarraitzen dutela".
