Album ilustratu bat sortzeko ilustrazio eta narraziogintza tailerra da Biko-teka. Idazleak eta ilustratzaileak elkarrekin aritzen dira lanean euskarazko liburu grafika edo album ilustratu berriak sortzeko. Tailerraren laugarren edizioa izanen da urtarrilaren 27tik 31ra Iruñean, eta dagoeneko izena ematea zabalik dago. Abenduaren 20an, ostiralean, amaituko da. Ilustratzaileak eta idazleak bakarka, zein bikoteka parte har dezakete ikastaroan.
Biko-tekan parte hartu nahi duten ilustratzaileek hiru ilustrazio bidali beharko dituzte, argitaratuak edo ez. Idazleek gehienez orrialde bateko luzera duen testu laburra bidali behar dute, eta bikoan aurkezten diren sortzaileek proiektuaren zirriborro bat aurkeztu behar dute. Gainera, curriculuma, NANaren kopia, posta elektronikoaren helbidea eta telefono zenbakia bidali behar dute ere galtzagorri@galtzagorri.eus helbide elektronikoan.
Gehienez zortzi bikotek parte hartuko dute Biko-teka tailerrean. Guztiek beka bana jasoko dute, beraz, ikastaroa doanekoa izanen da zortzi bikoteentzat. Tailerrak lau egun eta erdiz iraungo du; 37 ordu tailer-praktikoa da. Irakasleak Aitziber Alonso ilustratzailea eta Yolanda Arrieta idazlea izango dira, eta Karla Fernandez de Ganboa nazioarteko hezkuntzan dotorea eta haur eta gazte album ilustratuetan aditua hizlari gonbidatua izanen da.
