Hiru batean. Hori da Mintzakide programak iganderako eskaintzen duena. Batetik, euskara praktikatzea. Bestetik, Arakilgo naturaz gozatzea. Eta, azkenik, ibarreko altxorrak ezagutu eta haiekin gozatzea. Eskaintza onartzeko beharrezko bakarra euskaraz jakitea da. Izan ere, Mintzakide programa euskara jakin baina hitz egiteko gaitasun edo ohitura gutxi duten pertsonei hitz egiteko aukera emateko sortu zen.
Astean behin euskara dakien pertsona batekin elkartzen dira, hiruzpalau pertsonaz osatutako taldeetan. Ordu batez, edo gehiago nahi bada, gustuko zerbait egiten dute: dela kafea edan, paseatu, mendira joan, bizikletan ibili… Interesa duenak 600 482 024 telefono zenbakira hots egin edo Whatsapp mezua bidali besterik ez du egin behar. Asteroko martxaz aparte, hilean behin edo, jarduera osagarriak antolatzen ditu Mintzakide programak, beste mintzakide batzuekin harremanetan jartzeko eta hizketatzeko espazio seguruak eskaintzeko. Sakanako Mintzakidetik igandeko ibilaldian parte hartzera animatu dute.
| Oraingoz dauden Mintzakide taldeak | |||
| Herria | Eguna | Ordua | Tokia |
| Irurtzun | Asteartea | 18:00 | Iratxo elkartea |
| Ostirala | 09:00 | Pikuxar | |
| Ostirala | 19:00 | Pikuxar | |
| Lakuntza | Osteguna | 18:00 | |
| Arbizu | Osteguna | 18:00 | |
| Iturmendi | Astelehena (bi astean behin) | 19:00 | Aritzaga elkartea |
| Altsasu | Astelehena | 16:00 | Koxka |
| Osteguna | 10:00 | Kukuerreka elkartea | |
| Osteguna (bi astean behin. Euskalkia praktikatzeko) | 20:00 | Lezea | |
| Ostirala | 09:00 | Kaixo | |
| Ziordia | Ostirala | 16:00 | Liburutegia |
