Haur eskolako langileak otsailaren hasieraz geroztik mobilizazio dinamika dute martxan, 0-3 urte arteko haurrak hartzen dituzten zentroen baldintzak hobetu nahi dituztelako. Eta mobilizazio egutegi horren baitan, larunbat eguerdian auto karabana eginen dute Iruñean. Protesta ekintza horren bitartez haur eskoletako hezitzaileek haien egoera makurra azaleratu eta hura konpontzeko konponbideak eskatuko dituzte.
Hezitzaileek eskatzen dute, hasteko, ikasgeletan hezitzaile bakoitzak dituen ume ratioak jaisteko. Horretarako, gaur egungo plantilla bikoiztea exijitzen dute. Nafarroako Gobernuak udal haur eskolak finantzatzeko modulu bat du. Han jasotzen diren hainbat kontzepturi dagozkion diru kopuruak eguneratu beharra dagoela diote, bestela, udalak itto egiten baitira. Horrekin batera, gaur egungo haur eskolen ereduari eustea eta bi urteko gelarik ez sortzea eskatu dute hezitzaileek.
Mobilizazio egutegia
- Otsailak 26, larunbata
Auto karabana. - Martxoak 3, osteguna
Langileen batzarra martxoko ostegunetan. - Martxoak 12 eta 13, larunbata eta igandea
Itxialdia eskoletan. - Martxoak 26, larunbata
Elkarretaratzea. - Apirilak 7, osteguna
Greba eguna, eta langileen batzarra (baita 28an ere). - Apirilak 9, larunbata
Aldarrikapen jolasgunea. - Apirilak 23, larunbata
Greba aurreko langileen batzarra. - Maiatzak 2, astelehena
Haur eskola duinen aldeko greba mugagabearen hasiera.