Igandean izanen da Euskal Herriko Erdigunera martxa. Aurten bereziagoa izango da, Nafarroako eta Euskal Herriko mendi federazioen nolabaiteko bateratze prozesuaren abiapuntua izango baita. Mikel Goldarazena Goñik hurbiltzeko gonbita egin du.
Euskal lurraldetasuna aldarrikatzeko egun gisa jaio zen Euskal Herriko Erdigunera martxa eta horrela jarraitzen du.
Bai, halaxe da. Felix Isasa ingeniariak, orain dela urte dezente Euskal Herriko Erdigunea non zegoen kalkulatu zuen, barizentroaren kontzeptuan oinarrituta. Erdigunea Beriaingo tontorretik 650 metrora kokatu zuen, Olibesarion (1.236 m). 2004an hura seinalatzeko harriak eta bestelakoak jarri ziren. Azken urte hauetan mendi martxa bat antolatzen dugu bertara, euskal lurraldetasuna aldarrikatzeko.
Euskal Herriko Erdigunea toki paregabean egotea egokitu da.
Bai, Felix Isasa zenak esaten zuen: "pentsa Euskal Herriko Erdigunea industriagune batean legokeela; nolako frustrazioa". Baina toki berezi eta eder honetan egotea egokitu da, guretako oso hurbila eta Sakanako jendearendako oso berezia den Beriainen.
Irurtzungo Iratxo mendi taldekoek hasieratik txertatu zenuten Euskal Herriko Erdigunea urtero antolatzen duzuen Sakanako Ibilaldian.
Isasak erdigunearen berri eman zuenetik Sakanako Ibilaldiaren ibilbidea moldatu genuen eta ordutik urtero Euskal Herriko Erdigunetik pasatzen da. Jende askok ateratzen ditu argazkiak bertan. Urtean zehar jende pila bat pasatzen da bertatik.
Urte batzuk dira Iratxo elkartea eta Sakanako Mendizaleak taldeak Euskal Herriko Erdigunera martxa antolatzen hasi zinetela.
Bai, urriaren bigarren asteburuan egiten dugu. Garai batean Independentistak sarearekin antolatu genuen ekitaldia, azkeneko urteetan Nafarroa Berriz Altxa! egitasmoarekin, eta aurten Nafarroako Mendi Eskalada Federazioak eta Euskal Herriko Mendi Federazioak egin dute bat, ekitaldi berezia izango delako.
Berezia, zergatik?
1924an Federación Vasco Navarra de Alpinismo sortu zen. Bi urte barru 100 urte beteko dira. Garai luze batean Euskal Herri osorako bakarra zen mendi federazioa izan genuen; mendizale guztiok geunden Vasco Navarra federazioaren barruan. Zoritxarrez, duela 30 urte pasa autonomiak sortu zirenean federazio guztiak autonomiaka antolatu ziren. Une honetan Nafarroako eta Euskal Herriko federazioak prozesu bat martxan jarri dute, bi federazioen jarduna bateratua izan dadin. Federación Vasco Navarra de Alpinismo zenaren sorreraren 100. urteurrenaren harira 2024an ekitaldi asko antolatuko dira, eta igandean Euskal Herriko Erdiguneko Martxa lehenengo ekitaldia izango da, prozesu guztia abiatuko duena. Nafarroako Mendi eta Eskalada Federazioko presidente Martin Montañesek eta Euskal Herriko Mendi Federazioko presidente Zigor Egiak protokolo antzeko bat sinatuko dute. Bertan jasoko dira heldu diren bi urteetan zein pauso jarraituko diren bi entitateak entitate bakar gisa funtzionatzeko.
Beraz, lurraldetasun aldarrikapena mendi federazioetara aplikatuko da, bi federazioek bakar gisa lan egiteko prozesua onartuko baita.
Urte askotan bi federazioen artean ez da harreman handiegirik izan. Indiferentzia handia zegoen. Pertsonak aldatu dira, giroa aldatu da, eta egun oso giro onean daude bi zuzendaritzak: biak ados daude prozesu honetan. Sortuko den entitate berriak zein forma juridikoa hartuko duen aztertzen ari dira.
Honek guztiak igandeko Euskal Herriko Erdiguneko Martxari indarra emango dio.
Bai, aurten martxak plus bat du, bi federazioek sinatuko duten idazkian bi urte barru berriro bat egiteko duten borondatea azalduko baitute. Entitate berriaren formatu juridikoa aztergai dago, baina garrantzitsuena da bi federazioak sintonia onean daudela. Hemen herri bat dago, lurralde bat eta denok batera lan egiteko borondatea. Ni Federacion Vasco Navarra de Alpinismo taldearen 100. urteurreneko ekitaldiak antolatzeko bi bileretan egon naiz eta urteurreneko ekitaldiak giro oso onean antolatzen ari dira. Igandean lehen pausoa emango dugu Euskal Herriko Erdigunean.
"Igandean lehen pausoa emango da Euskal Herriko Erdigunean"
Bi adarretatik abiatuko da martxa.
Sakanatik Irañetako Udalak Andia aldera duen borda zoragarritik abiatuko da, 9:30ean. Hortik ekingo diogu igoerari. Beste adarra 8:45ean abiatuko da Senosiain aldetik. Bide honek aldapa gutxiago du, zelaiagoa da. Bi adarrak Euskal Herriko Erdigunean elkartu, eta 11:00etan hasiko da ekitaldia.
Eguraldi ona iragarri dute. Beraz, dena alde.
Bai, hala dirudi. Ekitaldia bukatuta, Irañetako bordan pintxo potea izanen da bildutako guztiendako, eta horretaz gain, herri bazkaria eginen da bordan bertan. Bazkarirako aurretik eman behar da izena 620 190 277 telefonoan edo Sakanako Mendizaleak edo Iratxoko jendeari esanez, eta han ikusiko dugu elkalr.
Lakuntzako baba txikiak dastatuko omen dituzue.
Bai, dena etxekoa eta bertakoa. Jendea animatzen ari da, eta badakigu Donostiako Egia auzoko mendi talde bat ere martxara etorriko dela. Sakandarrak egun eder honetan parte hartzera deitu nahi ditugu. Eguraldi ona egiten badu, askoz arrazoi gehiago martxara joateko. Anima daitezela.
