Mintzakide izateko bi baldintza bete behar dira: euskaraz komunikatzeko gai izatea eta astean ordubetez elkartzeko konpromisoa hartzea. Euskara praktikatu nahi dutenei zuzendutako programa da Mintzakide. Asmo bera duten pertsonen talde txikiak osatzen dira eta haiekin bidelari bat egoten da, euskara gehiago dakiena eta hizketaldiak dinamikoak izaten laguntzen duena. Taldekideek, elkarri lagunduz, euskararen ezagutzatik erabilerara egiten dute salto, beti ere, lagun giroan eta hizketan. Gertuko hizketaldien bidez aktibatzen dute euskararen erabileraren aldeko jarrera.
Sakanan Mintzakide programaren ardura Sakanako Mankomunitateko Euskara Zerbitzuak eta AEK-k dute. Ikasturte honetan dagoeneko dozena bat talde martxan daude: Altsasun lau, Irurtzunen hiru eta bana Uharte Arakilen, Lakuntzan, Etxarri Aranatzen eta Ziordian. Baina jakinik urte berriarekin jendeak bere buruari helburu berriak jartzen dizkiola, euskara praktikatu nahi dutenendako Mintzakide programan izena emateko epea zabaldu dute ilbeltzean. Interesa dutenek izena emateko 600 482 024 telefonora Whatsapp mezua bidali edo sakana_mintza@aek.eus e-posta helbidera idatzi dezake. Izen ematea doan da.
Astean behingo ordu hori pasa daiteke paseatzen, kirola egiten, kafea hartzen edo bestela. Norberak eta taldearen artean erabakitzen da. Horretaz aparte, mintzakideak eta euskaldunak elkartu eta hizkuntza erabiltzeko jarduera osagarriak antolatzen ditu programak, esaterako, mendi irteerak, erakusketetara bisitak eta beste. Sakanako Mintzakideko arduradunak 30 jardueretako eskaintza pasa berri die mintzakideei eta haien erantzunaren arabera antolatuko ditu jarduera horiek.
| Sakanako Mintzakide taldeak | |||
| Herria | Eguna | Ordua | Tokia |
| Irurtzun | Asteartea | 18:00 | Iratxo elkartea |
| Osteguna | 09:00 | Pikuxar | |
| Ostirala | 19:00 | Pikuxar | |
| Uharte Arakil | Ostirala | 17:30 | Amaia okindegi kafetegia |
| Lakuntza | Asteazkena | 18:30 | Jubilatu elkartea |
| Arbizu | Asteazkena | 18:00 | Kiroldegiko taberna |
| Etxarri Aranatz | Ostirala | 19:00 | Xapatero taberna |
| Altsasu | Astelehena | 10:00 | Gure Etxea eraikina |
| Astelehena | 16:00 | Gautxori taberna | |
| Osteguna (euskalkia) | 20:00 | Lezea Taberna | |
| Ostirala | 09:00 | Kaixo taberna | |
| Ziordia | Ostirala | 16:00 | Liburutegia |
