Albisteak,
- Irurtzun, Etxarri Aranatz eta Altsasuko Oinarrizko Gizarte Zerbitzuen Mankomunitateak elkarrekin lantzen ari dira Teknoadineko egitasmoa. Proiektuak 65 urtetik gorakoen nahi gabeko bakardadeari eta ondorioei aurre egin nahi die. Egitasmoa martxan jartzeko finantzazioa Europako funtsetatik jaso zuten sustatzaileek. Baina hura lastailean despeditu zen. Orain arduradunek jakinarazi dute Nafarroako Gobernuak 69.000 euro bideratuko dituela. Beraz, mankomunitateek egitasmoarekin aurrera jarraituko dute 2025ean. Horretarako beraien funtsek gehituko dituzte, eta dirulaguntzak lortzen ahaleginduko dira.
- Irañetako Udalak udaletxe zaharra eta mediku kontsultategia hartu zituen eraikina berritzeko lanen deialdia egin du. Obrak 219.914,68 euroko (BEZ barne) aurrekontua du. Deialdian interesa duten enpresak abenduaren 19ko 12:00ak arteko epea dute eskaintza aurkezteko. Kontratua bere egiten duen enpresek sei hilabete izanen ditu lanak despeditzeko. Aipatu lana Nafarroako Gobernuaren Toki Inbertsioen Planean jasota dago, beraz, Irañetako Udalak lanak finantzatzeko dirulaguntza jasoko du.
- Diru-bilketaren gaineko araudiari jarraituz, Altsasuko Udalak aditzera ematen du etxebizitza hutsen gaineko 2024ko bigarren seihilekoko zergako kuotak borondatez ordaintzeko abenduaren 30ean despedituko dela. Helbideratutako ordainagiriak abenduaren 13an kargatuko dira kontu korronteetan. Helbideratu gabeko ordainagiriak La Caixako edozein banku-bulegotan ordain daitezke, ordainagiria aurkeztuta. Borondatez ordaintzeko epea pasa eta gero, Diru-bilketaren gaineko Erregelamendu Orokorrean ezarritako errekarguak ezarriko dira, eta tramiteak eginen dira premiamendu bidez kobratzeko.
- Gizonezko batek gidatzen zuen autoa bidetik atera eta istripua izan zuen atzo goizean. Sakanako Autobian (A-10), Altsasuko sarreran, Olatzagutirako norabidean, izan zen ezbeharra. Istripuaren ondorioz 56 urteko gizonezkoak min hartu zuen. Altsasuko osasun etxeko medikuak eta erizainak autoan bertan lehen arretak eskaini ondoren Altsasuko parkeko suhiltzaileek maletategitik atera behar izan zuten zauritua. Anbulantzian Nafarroako Unibertsitate Ospitalera eraman zuten. Guardia Civila arduratu zen istripuaren ikerketaz.
Kirolak,
- Abenduaren lehen asteburuan hirugarren mailako hamargarren jardunaldia jokatu zen. Aralar Mendik Universidad de Navarra zuen aurkari, baina bi taldeek partida abenduaren 12ra atzeratzea erabaki zuten. Partida 20:30ean jokatuko da, OPUS-eko unibertsitatean. Hirugarren mailako liderra Gazte Berriak da (21 puntu). Aralar Mendik ez du liga hasiera gozoa izan eta hamargarren da (8 puntu). Universidad de Navarra arerio zuzena du, zortzigarren baita, 9 punturekin. Abenduaren 14an Aralar Mendik sailkapenean seigarren den Ibararte hartuko du ligako hamaikagarren jardunaldian, Uharte Arakilgo Larrebieta pilotalekuan. Bi partidak irabaziz gero sailkapenean nabarmen egingo luke gora Aralar Mendik. Ea egunotako atsedenaldia ongi etorri zaion.